Igande honetan Bide Ertzean taldeak diskoaren grabazioa gogora ekarriko du Saroben

Sarobera gerturatzen direnek grabazio estudio horretan egin zena biziberritzeko aukera izango dute. Izan ere, bideo ezberdinen bitartez toki horretan bertan egindako grabazioaren uneak ikusi ahal izango dituzte. Baita Suso Saiz ekoizlearen bideo interesgarria, zeinean ohiko estudioan grabatzeko erabakia baztertu eta Sarobe aukeratu izanaren arrazoiak azaltzen dituen.

TALDEKIDEAK ESKER ONEZ
Taldea grabazio aretora itzuliko da aurkezpen ekitaldi berezia egitera,  “Urnietako Sarobe Kulturgunean grabatu genuen disko berriena. Urnietako Udalaren eta Sarobe Kulturgunearen laguntza ezinbestekoa izan zen diskoaren grabazioan. Eta orain, esker onez, urnietarrentzat eta hurbildu nahi dutenentzat arituko gara Saroben. Kantuak joko ditugu, baita grabazioari buruzko xehetasunak eskaini ere”.
Bide Ertzean 1998an sortu zuten Imanol Ubedak, Jon Ander Ubedak eta Karlos Aranzegik. Geroztik bederatzi disko grabatu dituzte. Igande honetan hirurak arituko dira zuzenean, disko berriko kantuak eskaintzeko.

77 IZENEKO diskoa
“Iragana tirokatzen hasten badira, ez dut atzera egingo” kantatu zuten 2006an Non dira diskoan, 36ko Gerrari buruzko argitalpen hartan. Ildo beretik datoz “77” diskoko hainbat kantu. Baina izenburuak iradokitzen duen bezala, oraingoan Trantsizioa delako garaian erreparatu dute.
1977. Euskal Herria. Askatasuna, maitasuna, berdintasuna bizi eta gozatu nahi duen gazteria. Feminismoa eta ekologismoaren agerpena, ikastolen loraldia, sindikatuen bilakaera… 40 urteko gau beltzaren ondoren, orduko gazte belaunaldi haren ahalegina ez zen makala izan. Lan berri honetan, Bide Ertzean taldeak 70eko hamarkadan ipini du begipuntua. Baina nostalgiatik baino, hausnarketatik gehiago dute kantu berri hauek. Bidean erori ziren gazteak, bizirik iritsi zaizkigun balioak eta irakaspenak, askatu gabe jarraitzen duten korapiloak, etab.