Birziklapen tasak gora, atez atekoarekin

Birziklapen tasak irauli egin dira, eta Europako puntan kokatzen gaitu horrek hondakinen kudeaketan. Dagoeneko, erraustegiaren mamua uxatu da. Hauteskundeetara aurkeztu ginenetik argi genuen gure apustua Zero Zabor bidea jorratzea zela. Oraindik badugu zer hobetua, baina oso harro gaude herritarren erantzunaz. Gure ahalegin osoa jarri dugu gai hau herritarrekin landu eta aurrerapausoak elkarrekin eman ditzagun”. Denean asmatu ez dutela ere aipatu dute eta hobetzeko pausoak emateko borondatea agertu, “hobetzeko bide horretan, positibotzat har genezake herrian gai honek sortu duen eztabaida: batetik, hondakinen arazoa azaleratu delako eta ikuspegi ezberdinak ezagutu ditugulako; bestetik, parte hartze zuzena bermatzeko tresnak falta ditugula ikusi delako. Hutsune horiek betetzen saiatzea da orain gure erronka, eta horren erantzun zuzena da hilabeteotan herritarrekin landuko dugun parte hartze prozesu arautzailea”. Udaleko kideek herritarrei eskerrak eman nahi dizkiete egindako ahaleginagatik, “izan ere, ohiturak aldatzea ez da erraza eta zuetako bakoitzaren esfortzuak egin du posible datu hauek lortzea”.
Tolosaldeko Mankomunitateak jakinarazi duenez, atez ateko zabor bilketa sistema txertatu zenetik hilabete gutxi pasa den arren, norabideak eta kopuruek argi erakusten dute birziklapen tasa lehen unetik irauli dela. “Badira lehenagotik ondo bereizten genituen frakzioak, beira, esaterako. Papera eta ontzi arinak nahiko ondo bereizi arren oraindik bazen bereizten ez genuen zati bat. Hala ere, alderik handiena organikoak egin du, sortzen dugun hondakin guztien erdia izaki, errefusari zuzenean %50 kendu diogula esan daiteke”.

Egungo datuak:
Gaikako bilketa Villabonan 2012ko irailean

• %12,81 (papera)
• %5,37 (ontzi arinak)
• %0,05 (organikoa)
• %81,76 (errefusa)

Villabonan 2013ko irailean

• %21 (papera)
• %15 (ontzi arinak)
• %45,11 (organikoa)
• %19,23 (errefusa)

Zizurkilen zaborrak biltzen dituen kamioiaren ibilbidea Alegi-Anoeta-Irura-Zizurkil izaten da (Villabonak bere ibilbide propia du) eta, ondorioz, oraingoz ez dute Zizurkili soilik lotutako datu zehatzik. Tolosaldeko Mankomunitateak, hala ere, aipatu lau herri horietako datuei Amasa-Villabonakoak gehituta, ondorengo ondorioak atera ditu:
Gaikako bilketa, 2012ko irailean

• %10,9 (papera)
• %4,6 (ontzi arinak)
• % 0 (organikoa)
• %84,5 (errefusa)

Gaikako bilketa 2013ko irailean (Anoeta, Alegia, Irura, Villabona eta Zizurkil)

• %18,4 (papera)
• %15,3 (ontzi arinak)
• %50,5 (organikoa)
• %15,8 (errefusa)

Tolosaldeko Mankomunitateak azpimarratu duenez, atez atekoari esker, gaika sailkatzea nahitaezko bihurtu da, eta orduan eman da gaika sailkatzearen inguruan jauzia. “Hala, nabaria da iazko irailean eta aurtengo irailean atez ateko herrietan bildu den hondakinen sailkatzeak izan duen aldaketa. Diferentzia benetan eragiten duena, materia organikoa bereiztea da. Lehen zabortegira eramaten zen hondakin hori guztia, gaur egun ongarri bihurtzeko erabiltzen da”.