Atzo iluntzean Euskal Herriko Bertsolari Txapelketaren aurkezpen festa burutu zen Subijana etxean. Bertan ziren txapelketan parte hartuko duten bertsolari, epaile, gai-jartzaile eta antolatzaileetako asko. Beste asko eta askoren artean, Beterri-Aiztondo eskualdeko Amaia Agirre eta Jexux Mari Irazu bertsolariak edota Jon Zaldua gai-jartzailea. Aurkezpen saioa ederra izan zen. Amasa-Villabonako bertso eskolako Eñaut, Ekhi eta Endikak eman zioten hasiera. Txapelketako sintonia konposatu duen Igela bandak jarraitu zuen hainbat kantu eskainiz. Tartean, 1802ko Amasa-Villabonako bertso desafioa antzeztu zuten. Sebastian Lizaso eta Andoni Egaña bertsolariek txapelketaren inguruan abestu zuten, Saroi Jauregi Gipuzkoako eta Iñaki Murua Euskal Herriko Bertsozale elkarteko lehendakariek hitza hartu zuten... Txapelketaren saioak eta parte hartzaileak aurkeztuta, familia argazkia atera zen Beharzana pilotalekuan. Jan-edanen txanda iritsi zen ondoren:
Villabonako herriak, Subijana etxea Bertsozale Elkarteari utzi izana eskertuz, herriari esker-oneko keinua egin nahi izan dietela adierazi zuen Iñaki Muruak, Txapelketa Nagusiari Villabonan hasiera emanez.
Igande honetan, irailak 29, arratsaldeko 17:30etan hasita, Txapelketa Nagusiaren lehen kanporaketari ekingo zaio Beharzana pilotalekuan. Alaia Martin, Fredi Paia, Iker Zubeldia, Jon Martin, Nerea Elustondo eta Odei Barroso bertsolariak arituko dira kantuan.
