Azken lau urteetan egin bezala, aurten, Sanmiel jaien egitarau barruan, Urnietako Iñistorra Euskaltzaleen Biltzarrak irrintzi lehiaketa antolatuko du, irailaren 27an, ostiralarekin, egun horretako Iñistor Jaiari amaiera emateko antolatuko dena. Lehiaketa, parte hartu nahi duen ororentzat zabalik dago eta bi mailatan banatuko da: atal nagusia edo helduena, 14 urtez gorakoentzat eta gaztetxoen atala 14 urtez beherakoentzat.
Oinarriak eta sariak:
Antolatzaileek Euskal Herrian barrena irrintzi egiteko ohitura eta gaitasuna duten herritarrak erakarri nahi dituzte Urnietako saiora, herriko jaietan eta hamaika kultura eta folklore ospakizunetan irrintzia botatzeko ohitura eta iaiotasuna duten herritar horiek. Horretarako, bidaia-saria aurreikusi dute, Urnietara kanpotik datozen irrintzilariei kilometroen arabera ordainduko zaiena aurreikusitako diru-kopurua agortu bitartean. Hori bai, kanpotik datozenek irailaren 27a aurretik eman beharko dute izena bertaratze gastua jaso ahal izateko.
Jai eta umore giroan egin ohi da lehiaketa; beraz, antolatzaileek dei egiten diete Euskal Herriko irrintzizaleei Urnietara arratsalde pasa etor daitezen eta parte har dezaten iluntzean San Juan plazan bertan izango den lehiaketa honetan. Iazko IV. lehiaketan, Naiara Plaza bizkaitarra izan genuen irabazle helduen atalean eta Jon Tolosa haurren mailan.
Aurten ere sari ekonomikoa
V lehiaketa honetan ere, garaikurrarekin batera izango da sari ekonomikorik: helduen atal edo sail nagusian irabazlearentzat 150 eurokoa izango da eta bigarrenarentzat 75 eurokoa. Haurren atalean, berriz, irabazleak 50 euroko saria jasoko du eta hurrengo lau sailkatuek 10na euro. Sariak erabakiko dituen epaimahaia lau lagunek osatuko dute eta, besteak beste, indarra eta ozentasuna, abiadura, tonua, garapena eta kolpe bakarreko irrintzia izango dira aintzakotzat hartu beharko dituen ezaugarriak.
Antolakuntzak jakinarazi du, bestalde, kategoria bakoitzeko lehen urnietarrak ere saria jasoko duela.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!