Eguraldi ona izan da nagusi Adunan festa guztietan zehar, eta horren ondorioz jende dexente gerturatu da antolatutako ekitaldietara. Lehengo asteburuan, jubilatuen eguna eta txekor jate eguna ospatu ziren. Txekor jate egunean bertan izan zen Herri Krossa ere, 74 parte-hartzailerekin.
Bigarren asteburu honetan, amabirjinaren eguneko txupinazoarekin hasi ziren festak berriro ere. Txupinazoaren ostean, buruhandiak izan ziren umeak korrika eginez jarriz, eta gero dantza ezberdinez gozatu ahal izan zen; alde batetik haurren dantzez, eta hauen ondoren helduek dantzaturiko axeri dantzaz. Herri kirolek bete zuten arratsaldea, eta gauean berriz, Ingo al deu? taldekoen txanda izan zen, gau giroa alaituz.
Ostirala haurren eguna izan zen Jokulandiarekin, baina helduek ere izan zuten bere tartea, bai arratsaldeko mus txapelketan, eta baita gaueko bertsolariekin eta hauen ondorengo Gugaz taldearekin.
Larunbatean, patata tortila txapelketa, pintxo poteoa eta "Errimak oinetan" dantza emanaldia izan ziren, eta igandean berriz, urtero bezala, hainbeste jende biltzen duen kuadrilen arteko bazkaria. Beste urte batez ere, herriko frontoia kolorez bete zuten bertaratutako kuadrila ezberdinek.