Ekainaren 24tik uztailaren 19ra bitartean ospatuko diren “Oporretan euskaraz” udaleku irekietarako begiraleak aukeratzeko deialdia zabaldu du Zizurkilgo Udalak. Deialdian parte hartu ahal izateko hainbat baldintza bete beharra dago: Zizurkilen erroldatua egon behar da, 1995ean edo aurrez jaiotakoek soilik eman ahalko dute izena, euskara ondo menderatu behar da eta azterketa teoriko-praktikoa egin beharko da. Azterketa hau maiatzaren 24an, ostirala, izango da arratsaldeko 18:30ean, Atxulondo Kultur Etxean.
Guztira, sei begirale kontratatuko dira: “Oporretan Euskaraz”en lan esperientziarik ez duen begirale bat, urtebete edo biko esperientzia dutenen artean bi begirale eta hiru urte edo gehiagoko esperientzia dutenen artean hiru begirale kontratatuko dira.
Izen-ematea Aurrera plazako udal bulegoetan egin beharko da maiatzaren 17a, ostirala, baino lehen.
