Herri musikako tresna tradizionalen erakusketa izango da ikusgai Villabonako Gurea erakusketa gelan apirilaren 16tik 27ra bitarte. Hainbat musika instrumentu eta hots-jostailu ikusi ahal izango dira erakusketa erakargarri eta didaktiko honetan; lau taldetan banatuko dira, hain zuzen, musika tresnak: kordofonoak, aerofonoak, menbranofonoak, idiofonoak eta hots-jostailuak, guztiak ere Euskal Herriko musika tradizionalean aspaldi erabiliak.
Erakusketa, lehen aipatu moduan, apirilaren 16an zabalduko da, Juan Mari Beltranen hirukotearen emanaldi batekin. Emanaldia Gurea antzokian izango da, 18:30ean. Bertan, Euskal Herriko eskualde desberdinetako musikaren hainbat kantu, doinu eta dantzari egingo zaio errepasoa; alegia, erakusketan ikusiko diren soinu tresnetako asko astinduko dituzte Juan Mari Beltran, Ander Barrentxea eta Andoitz Antzizar musikariek.
Hauxe izango da erakusketaren ordutegia: astelehenetik ostiralera, 18:00etatik 20:30era, eta larunbatetan 10:00etatik 13:00etara. Erakusketa zein musika emanaldia doakoak izango dira, eta Villabonako Udaleko Kultura Sailak antolatu ditu.