Aiztondo Klasikak hamargarren edizioa ospatuko du

Aiztondo Klasika Batzordeak urteroko moduan,  proba entzutetsua antolatu  du aurten ere. Aipatu batzordea, eskualdeko lau herrietako elkarteetako kideek osatzen dute: Asteasuko Aitz-Ondo, Zizurkilgo Urkamendi, Adunako Txulobi eta Amasa-Villabonako Irrintzi elkarteetakoek, hain zuzen. Martxoaren 10ean, elkarteetako 100 lagun inguru arituko dira proba bideratzeko lanetan. Kide horietako bat Asteasuko Ramon Aiertza izango da, urtez urte batzordean parte hartzen duena. Aiertzak adierazi duenez, “urtero legez, 140 kilometro inguruko ibilbidea burutuko dute parte hartzaileek, goizeko 10:00etan Asteasutik abiatuta. Ondoren, itzuli bakoitzean, Zizurkil Gora eta Adunara igo beharko dute eta azkenaurreko bueltan, berriz, Alkizara”.

150 txirrindulari inguru
Oraindik gonbidatuak zehazteko badaude ere, estatu mailako 18 talde izango direla zehaztu du Ramon Aiertzak: “Espainiako Federazioan sailkatutako lehen 18 taldeak ariko dira lehian eta bestetik, gonbidatutako lau talde”. Era berean, bi kategoriatako txirrindulariak lehiatuko dira: Elite mailakoak eta 23 urtez azpikoak (Sub-23). Espainiako Koparen baitako froga izango da Asteasutik abiatu eta Zizurkil Goian amaituko dena, zalantzarik gabe, zer ikusirik eskainiko duena.

Aurtengo ibilbidea
Asteasutik abiatu eta Zizurkilera iritsi bitartean, 140 kilometroko ibilbide luzea egin beharko dute txirrindulariek. Hauxe da ibilbidea:

• Asteasutik abiatuta, Villabona, Irura, Anoeta, Tolosa, Alegia, Ikaztegieta, Legorreta eta Itsasondo zeharkatu eta Ordiziaraino (10:37).
• Itzulera bide beretik egingo dute, Alkizako bidegurutzeraino iritsi arte. Handik Larraulgo bidegurutzetik barrena Asteasura (11:19) joango dira.
• Asteasutik, Zizurkilera, Adunara eta Villabonara. Ondoren, Alkizako nahiz Larraulgo bidegurutzeak igarota, Asteasura (4 itzuli).
• Laugarren itzulian, Alkiza herrira igo beharko dute (12:48). Handik Anoeta, Irura  eta Villabona zeharkatu, eta ondoren, Alkizako nahiz Larraulgo bidegurutzeak igarota Asteasura. Gero, Zizurkildik barrena Adunara eta Villabonara. Amaitzeko, Villabonatik Asteasura eta Asteasutik Zizurkilera igo beharko dute. Bertan izango da helmuga.

Antolatzaileek, probak hiru ordu eta erdi inguru iraungo duela aurreikusten dute, 10:00etatik 13:30ak arte, gutxi gorabehera. Beraz, lasterketak irauten duen bitartean, trafikoa geldiarazi egingo da.

Garaileen zerrenda
Hara hemen, 2003 urtean proba antolatzeari ekin ziotenetik gaur egunera arte, Aiztondo Klasikan lehen postuan helmugaratu diren txirrindulariak, urtez urte:

• 2012-III-11: Ibai Salas Zorrozua.
• 2011-III-13: Eduard Prades Reverte.
• 2010-III-07: Víctor de la Parte González.
• 2009-III-08: Jorge Martín Montenegro.
• 2008-III-02: David Belda García.
• 2007-III-04: Oscar Pujol Muñoz.
• 2006-III-05: Didac Ortega Orts.
• 2004: Carlos Castaño Panadero.
• 2003: José Angel Gómez Marchante.