Lehen urtean, txapelak erostera
Txapela Egunean baldintza bakarra txapela jantzita ibiltzea izan ohi da. Lehen urtean, baina, inork falta izanda ere, Tolosako Boinas Elosegitik erostea erabaki zuten: “Txapela Eguna antolatzearen asmoa azaldu genienean asko gustatu zitzaien. Lantegi osoa erakutsi ziguten eta txapelen inguruko azalpenak ere eman zizkiguten. Txapela janzteko erak gure nortasuna islatzen duela ere adierazi ziguten. Horrela bada, hiru tamaina desberdinetako txapelak erosi eta tabernan jarri genituen saltzen; denak saldu ziren”.
Belaunaldi guztiak bat eginda
Egun honek berezitasunik baldin badu adina izango da aipagarrienetako bat. Txapela Egunaren baitan belaunaldi desberdinetako jendea biltzen da mahai inguruan. “Lehen Txapela Egunean, txapela Nekolako Prasku Alkortari eman genion hartan, afaltzen 70 bat lagun izango ginen. Gazteenak bederatzi urte zituen eta zaharrenak, berriz, 89”. Oraindik ohitura hori mantentzen den arren, zertxobait aldatu dela azaldu dute: “Lehenengo urteetan jende helduagoa etortzen zen. Orain zaharrenetakoak gu izaten gara”.
Ohorezko txapela
Aurtengo omenduak izateagatik oso pozik daude taldekideak. Inaxioren iritziz, “lan-taldeari ez ezik, Txapela Egunari berari emango zaio txapela”. Urteek aurrera egin ahala, gauza batzuk aldatu diren arren, gazteek aurrera jarraitzeko ilusioa dutela ikusten dute protagonistek: “Egun polita izaten da eta gazteek aurrera jarraitu beharko lukete festarekin. Ea norbaitek hartzen duen testigua”, azaldu dute irribarre artean.
Andramaritako suziria
Azken urteetan, Txapela Eguneko omenduak izaten du Andramaritako suziria botatzeko ardura: “Ahal izanez gero hirurok botako dugu. Inaxio eta Joxinek hamar urtez festa guztiak grabatu dituzte eta polita litzateke irudi horiek gogora ekartzea. Horrez gain, Txapela Egunari erreferentzia txikiren bat egitea ere espero dugu”, aipatu du Xabierrek.
Egitaraua
- 16:00: Txapeldunen mus lehiaketa zentroan.
- 19:00: Trikipoteoa.
- Ondoren, txapel jaurtiketa txapelketa.
- 21:00 Txapeldunen afaria zentroan: Arrai zopa, oiloa saltsan, mamia, kafea eta kopa. 19 €.
- Afal ondoan XX. Txapela Eguneko txapela jarriko zaie lehen edizioaren antolatzaileei. Iazko edizioko txapeldun Miguel Mari Zurutuza "Potxolok" jarriko die.
Orain arteko txapeldunak
1994 Nekolako Prasku Alkorta.
1995 Elizaldeko Inixio Aranburu.
1996 Garetzako Anttonio Kortajarena.
1997 Pantxikaneko Pilar Mendizabal.
1998 Pello Mari Otaño.
1999 Iruñako Jokin Geresta.
2000 Iruñako Joxelu Geresta, “Ttotto”.
2001 Mugirozarreko Anttonio Otamendi.
2002 Donemiliagako Dionisio Bengoetxea.
2003 Nekolako Inaxi Aranburu.
2004 Saizarko Pedro Mari Eizagirre.
2005 Patxi Lartin.
2006 Pantxikaneko Joxe Mari Mendizabal.
2007 Zentroa.
2008 Andrezketako Maria Dolores Eizmendi.
2009 Larrondobunoko Joxe Mari Tolosa.
2010 Bernarda Usabiaga.
2011 Iruñako Lesmes Mujika.
2012 Migel Mari Zurutuza, “Potxolo”.
2013 Txapela-egunari hasiera eman zion lan-taldea.