Axeri Dantza izan zen igandeko lehen ekitaldia; ikusleen txalo eta irribarreak eragin zituen dantzak, modu bizi eta ikusgarrian jardun baitziren dantzariak. Ondoren, talo, gaztain nahiz saihetsezurren txanda heldu zen bertaratutakoentzat; eztarriak bustitzeko sagardo kupela ere jarri zen pilotalekuan. Nabarmentzekoa da sukaldean aritu ziren lagunen ahalegina.
Musikarik ez zen falta izan goiz osoan; Axeri Dantzaren txistu hotsak isilduta, Aiztondo bailarako kantuzaleek eta Loatzo musika eskolako gaztetxoek hartu zuten lekukoa.
Kultur astearen balantzea egiteko orduan, baikor agertu zen Iñaki Aristeta, kultura zinegotzia: “Ekitaldi sorta zabala antolatzen saiatu gara aurten ere; denen gusturako saioak, hitzaldiak, haur ekintzak… eskaintzen ahalegindu gara eta lortu dugulakoan nago”.
Axeri Dantzaren inguruan aurrera eraman den ekimena azpimarratu du Aristetak: “Herriko kultur ondarea indartu nahi horretan, Axeri Dantza suspertzeko asmoz sortu den taldetxoa nabarmenduko nuke. Parte-hartze aldetik pittin bat gainbehera zetorren, eta indarberritzeko saiakera egin du taldeak. Gaur, plazan, argi ikusi da herritarrengandik harrera ona jaso duela, bide onetik doala alegia”.
Ekitaldiz beteriko igandeak eman zion bukaera Adunako Kultur asteari.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!