Lehen hitzordua azaroaren 9an izango da Villabonan, iluntzeko 19:30etan hasita. Hurrengoa azaroaren 10ean Hernanin, goizeko 10:30etatik aurrera Gabriel Zelaia ikastetxeko futbol zalaian.
PAKISTAN ALDEKO IRAKASLEAK
Hernaniko cricket erakustaldian Azkoitian bizi eta Banaiz Bagararen eskutik euskara ikasten ari diren Pakistango herritarrak irakasle lanetan arituko dira.
Pakistandar gehienak bezalaxe, cricket zaletasun handia dute. Izan ere, kirol jarduera hura oso ezaguna da Pakistanen. Cricket jokalari ugadi dago han, eta baita Indian ere.
Cricketa, berez, Inglaterran sortu zen eta ingeles kolonoek aurreko mendean Asiako lurralde horietara eraman zuten.
Azkoitian pakistandar jatorriko gizatalde nahiko handia bizi da, eta ia egunero Azkoitiako frontoian cricketean aritzen dira.
JARDUNALDI IREKIAK
Banaiz Bagara elkarteak jardunaldi irekiak antolatu ditu, eskualdeko kirolzale guztiak gogoan izanik. Bide batez, pakistandarrak mintzapraktika saioetan murgildu nahiko lituzkete. Eta horretarako zer hobea cricket irakasle lanetan jartzea baino.
Tailerraren lehen atalean, pakistandarrek kirol horri buruzko informazioa euskaraz helaraziko dute: non sortu zen, non duen tradizio gehien, nola jolasten den, etab. Ondoren, beroketa ariketak egitearekin batera jolasteko teknikak azalduko dituzte.
Giroan sartzeko jokaldiak prestatuko dituzte eta, azkenik, adiskidetasun giroan partida antolatuko dute.
Ariketa fisikoa egin ostean, Banaiz Bagarak parte hartzaileei luntxa eskainiko die.
Kirol jarduera berria ezagutzeko nahiz euskaldun berriak gure hizkuntzan murgiltzeko aukera paregabea dago Villabonan eta Hernanin, Petra Elser buru duen elkartearen eskutik.
Banaiz Bagara elkarteak cricket jardunaldi irekiak antolatu ditu. Euskal Herritik urrun hainbesteko tradizio eta kirolari dituen kirol jarduera gertutik ezagutzeko aukera izango da. Bi hitzordu ipini dituzte horretarako: Azaroaren 9an Villabonako frontoian, eta 10ean Hernaniko Gabriel Zelaia ikastetxeko futbol zelaian.
Banaiz Bagarak helburuen artean ditu herrialde eta kultura ezberdinetako aisialdia bultzatzea edota euskara sustatzea. Ekimen berri honen harira zera adierazi dute, “Buruntzaldekoek cricket kirola ezagutzea nahiko genuke. Bestaldetik, kirol jarduera horren azalpenak eskaintzen arituko diren etorkinak euskararen munduan murgiltzea lortu nahiko genuke. Urnieta eta Andoaingo herritar guztiei jardunaldi horietan parte hartzeko gonbidapena luzatu nahi diegu, beste herrialdeetako pertsonekin esperientzia berriak bizitzera animatuz”.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!