Ekainaren 3an, Gipuzkoako emakumezkoen sega txapelketa ospatuko da eguerdiko 12:00etan Arratzainen. Bertan, Igaro Balda (Hernialde), Alatzne Etxaburua (Zizurkil) eta Arrate Garin (Legorreta) ibiliko dira lehian.
Segalari bakoitzak 20 minutuko saioa egin beharko du eta kilo gehien ebaki eta pilatzen duenak irabaziko du txapela. Txapelketa pisura erabakiko den arren, segalariek txukun ebaki beharko dute belarra, bestela zigorra jaso baitezakete.
Segalari bakoitzak bere lan taldea izango du: zorroztaile edo laguntzaile bat, sega-pikatzaile bat, pisuko bi kontrolatzaile eta hiru belar biltzaile.
Orain arte Gipuzkoan bakarrik jokatu izan da emakumezkoen txapelketa ofizial bat, baina beti sail bat edo bi ebakitzera. Aurten, aldiz, lehendabizikoz, denbora izango da neurtzailea.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
