Gazte asanbladaren urteurrena ospatzeko egitaraua
Eekintzaz betetako hilabetea antolatu dute. Adin ezberdineko herritarrei bertan parte hartzeko deia luzatzen diete asanbladako kideek:
Astean zehar:
Film emanaldiak asteartetan eta dokumentalak ostegunetan. Maiatzak 11 eta 18, ostirala, umeentzako jolasak plazan.
Asteburuetan:
- Maiatzak 5, larunbata: Sacemgo Gaztetxetik Onddoko logotipoa irudikatzen duen onddoaren jaitsiera –Berdura plazan zintzilikatuko dute hilabete osorako–. Trikipoteoa. Bokata festa Sacemgo lokalean eta DJ emanaldia.
- Maiatzak 12, larunbata: Goizean zehar, koadrilen arteko gazte olinpiadak. Ondoren, bertso bazkaria Hamaika Bertute taldeko bertsolariekin.
- Maiatzak 19, larunbata: Goizean mendi martxa Onddo aldera eta bertan, zuhaitz landaketa. Eguerdian, bazkaria plazan eta ondoren, mus txapelketa.
- Maiatzak 26, larunbata: Onddorock jaialdia, arratsaldetik aurrera. Sarrera: Doan. Taldeak: Lua, Switch (Tolosa), Flattened frog masacre (Urnieta), Glaucoma sound sistem (Tolosa), Materia gris (Igorre) eta 3gabe2.
Gazte asanbladaren egungo egoeraz nahiz aurrera begira dituzten asmoez hitz egiteko, Igor Fernandez, Jon Ander Esnaola, Aitor Laskurain, Andoni Uzkudun, Kepa Nazabal eta Aitor Landa taldekideek hartu dute hitza. Onddo gaztea asanbladak bide luzea egin du 1997 urtean sortu zenetik. Taldekideek jakinarazi dutenez, tartean geldialdiren bat izan den arren, urtez urte aurrera jarraitu dute, herrian gazte mugimendua sustatzeko asmotan. Egungo Onddoren egoeraz galdetuta, boladarik onenean ez badago ere, asanblada indartzeko asmotan lanean ari direla adierazi dute elkarrizketatuek, “egun 30en bat lagun izango gara gazte asanbladako kideak. Taldea martxan den arren, ardurak hartzeko gogoz jende gutxiago agertzen da. Eguneroko ekintzatan murgiltzea kosta egiten zaie, oro har, taldekideei”, diote. Ahulaldi horretan, lokal egokirik ez izateak zuzen-zuzeneko eragina duela uste dute, “Behar-Zana elkartearen egoitza zaharrean biltzen ginenean, herriaren erdi-erdian egonda, askoz ere mugimendu handiagoa sortzen zen. Azken boladan, Sacemgo etxolara joan ginenez geroztik, beheraldi nabarmena izan du asanbaldak”.
Behar-Zanatik Sacemgo etxolara
Euren ustez, Gaztetxea leku egokian kokatuta balego, askoz ere egoera hobean leudeke, “Sacemgo etxola herritik kanpo geratzen da eta jendeari kosta egiten zaio hara gerturatzea. Behin gerturatzen hasita ere, oso lokal txikia da eta ez gara taldekide guztiak ondo sartzen. Ezin dugu, esaterako, film emanaldirik antolatu; bost lagun baino gehiagorentzat leku justua baitago. Zer esanik ez kontzerturen bat antolatu nahiko bagenu…”. Lokala hizpide hartuta, kritika luzatu diote Udalari, “Sacemgo etxola ez da leku egokia. Udalak, denboraldi baterako izango zelakoan eskaini zigun, Behar-Zana elkartearena zen egoitza zaharrean obrak egin ahala, bertara itzultzeko aukera izango genuelakoan, baina oraindik ez dugu inolako erantzunik jaso”. Izan ere, duela urtebete pasatxo, Behar-Zanako egoitza zaharra egoera eskasean zegoela eta, Udal arkitektoak sinatutako agiria jaso zuten, segurtasunagatik handik ateratzeko eskatuz. “Lokala intsonorizatu eta egurrezko egitura berritu beharra zegoela esan ziguten, bertan biltzea arriskutsua izan zitekeelakoan”, azaldu dute.
Martxa hartu nahian
Aipatu hutsuneak gainditu nahian, gazte asanblada indartu eta aurrera jarraitzeko ahaleginean ari dira lanean, “jendea asanbladara gertura dadin ari gara maiatzeko ekitaldi sorta antolatzen” eta aurrerantzean ere ekintzak bideratzen jarraitzeko ilusioa dute, “herri giroa piztu eta gazteen arteko harremana bultzatzeko beharra sumatzen baitugu”. Koadrilen arteko mugak hautsi nahi dituzte eta koadrila ezberdinetako kideak elkartu, “gazte asanbladan sartu ginenean, koadrila ezberdinetako kideak ginen gu ere. Orain guztiok elkarrekin ibiltzen gara. Gazte asanblada gurea denik ez dezala inork pentsa. Koadrila gazte nahiz helduagoak gertura daitezen zain gaude, guztion artean ideia berriak lantzeko aukera izan dezagun”. Azken asteotan, Errebote plazan bertan egiten dituzte bilerak ostiral arratsaldetan, “Sacemgo etxolara joatea baino errazagoa denez, jende gehiago gertura dadin. Hogei bat lagun bildu ohi gara gutxi gorabehera”. Gazte kopuruak ahotan, Urdapilleta etxean Gaztetxea egon zen garaia etorri zaie gogora, “garai hartan jende piloa biltzen zen bertan: gazte asanbladakoak nahiz asanbladakoak ez zirenak. Herrian bertan lokala berreskuratuko bagenu, dudarik gabe, gazte mugimendua berriz ere indartu egingo litzatekeela uste dugu”. Euren ohiko egutegia berreskuratzeko nahia azaldu dute: “zine kluba asteazkenetan; hitzaldiak ostegunetan; mus txapelketak ostiraletan… Asteburuetako mugimendua, umeentzako ekintzak, eskulan tailerrak… Hainbat bilera egiteko ere erabiltzen zen Behar-Zanako egoitza: AHT edota Aiztondoko nekazari elkartekoena, besteak beste”.
Santio festei begira
Gaztetxea Kale Nagusian kokatuta izateak, Santio festetan ere eragina izaten zuela aipatu dute, “Gaztetxea herriaren erdigunean egoteak bizitza handia ematen zien festei. Jende asko etortzen zen bertara eta giro ederra sortzen zen”. Bada, Onddo gazte asanbladako kideak aurtengo Santioei begira jarriak dira dagoeneko: “gazteak elkartu eta gure ekintzak gauzatzeko gunea izan dezagun, Kultur Etxearen atzealdeko plazan txosna eta eszenatokia jartzeko baimena eskatu diogu Udalari. Garrantzitsua iruditzen zaigu herriko festetan, gazteok elkartzeko gure gunea izan dezagun”. Zizurkil goian berriki sortu da herriko gazte mordoa biltzen duen Txepetxa gazte asanblada. Asteasun, apirilean inauguratu zuen Matxintxulo gazte asanbladak Elizmendiko Gaztetxea… Eskualdeko gazte asanbladak indarrean dauden une honetan, Onddoko kideak aipatu taldeekin harremanetan daude eta ez dute baztertzen aurrera begira, elkarlanean ekintzaren bat antolatzea, “Joan zen abenduan, esaterako, elkarrekin izan ginen Euskal Selekzioaren partida ikusten Bilbon”. Bada inguruko gazte asanblada guztiak batzen dituen ezaugarri bat: herri giroa eta, bereziki, gazte giroa suspertzea. Horixe baita faltan botatzen dutena: “mugimendu pixka bat gehiago”.
Jostion taldea, udari begira
Onddo gazte asanbladako hainbat kide, –tartean Igor Fernandez eta Jon Ander Artola elkarrizketatuak–, Jostion musika taldeko kideak dira. Berriki Sacem lantegiko lokal batean hasi dira entseatzen, izan ere, aurrez liburutegiaren azpialdean zuten entsegu lekua azaroko uholdeetan guztiz kaltetua gertatu baitzen. “Duela denbora gutxi hasi gara berriz entseatzen, bost hilabetez geldirik egon eta gero. Villabonako lau musika talderen artean –Lain, The Kantukis, izena jartzeke duen beste talde bat eta gu, Jostion– musika elkarte bat osatu dugu eta elkarte horri uzten dio Udalak entsegu lekua. Entseatzeko lekua behar duen taldeak, beraz, elkarte horretako kide egin behar du”, argitu dute Igor eta Jon Anderrek. Lokala egokitzea euren lana dela esatearekin batera, sos beharrean daudela gaineratu dute, “lokala gure erara egokitzeko dirua behar dugu eta udan kontzertuak emateko entseatzen hasiak gara. Gogoz eutsi diogu berriz ere entseguen bideari, kantuak moldatu eta berriak eginez. Udako kontzertuak ahalik eta ondoen prestatu eta erritmoa hartzea da gure nahia”. Santio festetan, emanaldiren bat eskaini nahiko lukete. “Lain, The Kantukis eta beste talderen batekin batera, kontzertua emateko asmoa dugu herriko festetan”.