XVIII. Maiatza Saltsan ekimena bor-borka dator

Erabiltzailearen aurpegia Aiurri 2012ko api. 24a, 21:04

Gaur eguerdian, Joxe Mari Luengo alkateak, Leire Zubeldia zinegotziak eta Maider Arregi kultur teknikariak, XVIII. Maiatza Saltsan ekimena aurkeztu dute Zizurkilgo udaletxean. Azpititulu eta guzti dator aurtengo ekinaldia: '1512-2012, Erresuma zaharrari keinua', hain zuzen ere. Aurtengo edizioko ekintzak Nafarroako konkistaren urteurrenarekin lotzeak, badu arrazoi argi bat: Zizurkilgo armarrioko hamabi kanoien irudia zuzen-zuzenean lotuta dagoela gertaera haien kapitulu txiki batekin.

Adin guztietako herritarrentzako egitarau zabala prestatzen ahalegindu dira Udal ordezkariak. Eta saiakera berezia ere egin dute: Maiatza Saltsan ekimeneko ekintza guztiak doakoak izango baitira. Segidan, maiatzaren 4tik 30era luzatuko den egitaraua:

-Maiatzak 4, ostirala: Gartxot filma, aire librean. Eguraldi onarekin Aurrera plazan, txarrarekin Zizurkil goiko zimiterioan. 22:00etan.

-Maiatzak 6, igandea: Andatza eguna. Oinezko ibilaldiaren ondoren, hamaiketakoa, herri kirolak eta bazkaria. Trikitilariak eta bertsolariak.

-Maiatzak 10, osteguna: ‘1512 Nafarroaren konkista', bideo proiekzioa eta azalpena, Nabarralderen eskutik. Hizlaria: Anjel Rekalde. 19:30etan Atxulondon.

-Maiatzak 12, larunbata: Alurr dantza taldearen ‘Izanak dirau 1512' ikuskizun berria. 22:30etan Zizurkil goiko Intxaur pilotalekuan.

-Maiatzak 17, osteguna: ‘Zizurkilgo armarria' hitzaldia, Aranzadi zientzia elkartearen eskutik. Hizlaria: Juantxo Agirre Mauleon. 19:30etan Atxulondon.

-Maiatzak 19, larunbata: Kantu eguna Zizurkil goian. 12:00etatik aurrera, Kantu Jirako kideen emanaldia kalean. 14:00etan kantu bazkaria. Bazkalondoan, Amalur taldearekin kantu saioa. Ondoren, erromeria.

-Maiatzak 25, ostirala: Musika emanaldi instrumentala Loatzo musika eskolako kideen eskutik, Kantu Jirako kideek abestuta. Abestiak Nafarroako erresumarekin lotutakoak izango dira. 19:00etan Atxulondon.

-Maiatzak 30, asteazkena: Ipuin kontaketa 5-10 urte bitarteko umeentzat, Kontu Kantoi taldearen eskutik. 17:15etan Atxulondon.

 

Gizartea Zizurkil
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!