Txolarre Irratiak lehen zuzeneko emankizuna egin zuenetik 11 urte bete ziren joan den abenduaren 26an. Ordutik etenik gabe jardun du euskaraz eskualdearen berri ematen. Euskarazko hedabideena bidegurutze eta zailtasunez beteriko bidezidorra da, baina egin beharrekoa, Tolosaldeak euskara hutsezko irratia merezi eta behar duelako. Ahalegin horretan beste bultzada bat izango da Leidorreko bertso saioa. Irratiak eskualdean duen babesaren erakustaldia.
Urtarrilaren 21ean Tolosako Leidorren bertso saio mundiala izango da Txolarre Irratiak antolatuta. Tolosako Udalaren laguntzaz, hirugarren urtea da jarraian saioa antolatzen duela Tolosaldeko euskarazko irratiak. Hiruetan izan du lagun eta lankide Amaia Agirre, eskualdeko bertsolaria. Aurten ere, gai jartzaile bezala arituko da antzokiko taula gainean.
Amaia Agirreren esanetara sei bertsolari: Andoni Egaña, Jon Maia, Amets Arzallus, Maialen Lujanbio, Jexux Mari Irazu eta Gipuzkoako txapeldun berria, Aitor Sarriegi. Arratsaldeko 18:00etan hasiko da eta puntako saioa izango da, ezbairik gabe. Sarrerak 10 eurotan izango dira salgai. Aldez aurretik eskuratu ahal izango dira eskualdeko ondorengo lekuotan:
Tolosan Raku, Denak, Orbela eta Kantabriko tabernetan; Villabonan Amasa kafetegian; Zizurkilen Iriarte tabernan, Anoetan Buztina tabernan, Alegin Ixkina tabernan, Ibarran Zubiaurre tabernan eta Berastegin Urepele elkartean. Urtarrilaren 19ra arte egongo dira sarrerak saltokietan salgai. Egunean bertan, hilaren 21ean, Leidorreko leihatilan salgai jarriko dira gainerakoak.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!