Rosa Arregi ingurumen zinegotziak, bere aldetik, Villabonako Udalak, harategi eta arrandegietan erosketak egiterakoan, datorren astean banatuko dituzten ontzi berrerabilgarrien erabilera sustatu nahi dutela adierazi du. Bi egunetan zehar banatuko dituzte aipatu ontziak Berdura plazan: Abenduak 19, astelehena, 15:00etatik 19:00etara eta abenduak 20, asteartea, 09:00etatik 13:00etara. Era berean, "tuperraren kanpainak iraungo duen sei hilabeteetan, ekimenarekin bat egin duten saltokietan (Garayar, Mutio, Itsaskide eta Miguel Ruiz arrandegietan nahiz Brontxillo, Benito, Iguaran eta Musrturinea harategietan) saski eder baten zozketan parte hartu ahal izateko txartela banatuko zaio erosleari", jakinarazi du. Kanpainarekin bat egiteko deia luzatu die herritarrei Rosa zinegotziak, "alde batetik herrian bertan erosketak eginez eta bestetik, zabor kopurua murrizten lagunduz".
Villabonako Udaleko ingurumen sailak, Zero zabor kontzeptuarekin bat eginez, herriko arrandegi eta harategietan erabiltzeko tupperraren kanpaina jarri du abian. Kanpaina aurkezteko, hitza hartu dute gaur eguerdian Villabonako alkate Galder Azkuek, Kutxa Ekoguneako ordezkariak eta Rosa Arregi ingurumen zinegotziak. Zero zabor, kontzeptu bat baino gehiago helburu bat dela gogorarazi du alkateak, "gure eguneroko jardunean erabili behar ditugun materialak alferrik galdu eta elementu kutsakor bihurtzen ez uztean datza helburua", adierazi du, hondakinak ahalik eta gutxien izateko estrategiak jerarkia honetan sailkatuta: "gutxitzea, berrerabiltzea eta birziklatzea. Onena, produktuak ahalik eta hondakin gutxien sortzeko moduan ekoiztea da, hondakinik onena sortzen ez dena baita". Abian jarritako kanpainak Zero Zabor estrategiaren lehen bi helburuak betetzen ditu: hondakinak murriztea eta berrerabiltzea:
Kutxa Ekoguneako ordezkariak adierazi duenez, Gipuzkoa mailan orain gutxi hasi ziren antzeko proiektuak zabaltzen eta ekimena Hernanin eta Donostian jarri zen martxan lehenik. Villabonako Udalak zaborra ondo kudeatzeko duen interesa eskertzekoa dela aipatu ostean, kanpainaren helburua hiru ardatzetan oinarritzen dela azaldu du: 1.- Erosotasuna, erosketak egiterakoan. 2.- Arrandegi eta harategietan paper eta plastiko gutxiago erabiltzea. 3.- Ingurunearen alde pausoa ematea. Datorren astetik aurrera herritarren artean banatuko den tupper ontzia margo ekologikoduna eta jakiez beteta zuzenean hozkailuan sartzeko prestatuta dagoela argitu du, herritarrak paper eta plastiko gutxiago erabiltzera animatuz eta ekimenean parte hartu duten udaletxe, herriko arrandegi eta harategi nahiz Kutxako bezeroei eskerrak emanez.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!