Gaur eguerdian Villabonako udaletxeko batzar aretoan aurkeztu dute IKERMAP enpresak egindako Amasa-Villabonako mapa toponimikoa. Aurkezpenean Galder Azkue alkateak eta IKERMAP enpresako Imanol Goikoetxeak hartu dute hitza. Besteak beste, aurkezpenean izan dira Nora Urbizu euskara eta kultur zinegotzia, Maite Arregi eta Joxean Cubero euskara teknikariak, Maixabel Arrieta aurreko legealdiko alkatea edota Fernando Letamendia, mapa toponimikoa osatzen lagundu duen Arratzain baserriko herritarra. Datorren astelehenetik aurrera, Amasa-Villabonako etxe guztietan banatuko dute mapa, paperezko euskarrian:
Galder Azkue alkateak adierazi du nola Villabonako Udalak, Amasa-Villabonako kultur ondarea berreskuratu eta herritarren artean sustatzeko helburuarekin, toponimiari buruzko ikerketa egin zuen IKERMAP enpresarekin 2009 urtean. Bildutako leku-izenak erakutsiz, hainbat herritarren laguntzarekin osatutako lana jendaurrean aurkeztu zuten lehenik. Herritarrek eginiko ekarpenekin osatu zuten gerora mapa toponimikoa, gaur eguerdian Villabonako udaletxean aurkeztu dutena. "Astelehenetik aurrera herriko etxe guztietan banatuko da mapa eta herriko leku izenak suspertzeko balioko duela espero dugu, belaunaldi gazteen artean bereziki", azaldu du Galderrek, Udala ere herriko leku izenak egoki erabiltzen saiatuko dela nabarmenduz. Alkateak eskerrak eman dizkie mapa toponimikoa osatzen parte hartu duten guztiei: IKERMAP enpresako kideei, euskara teknikariei nahiz beren lekukotzak emanez lagundu duten herritarrei. Mapa toponimikoa prozesu parte hartzailearen bidez osatu dela azaldu du aurkezpena amaitu aurretik.
Harrera beroa Amasa-Villabonan
IKERMAP enpresako Imanol Goikoetxeak, Amasa-Villabonako mapa toponimikoa osatu duenak, paperezko euskarriaren atzean dagoen informazio interesgarria ekarri du gogora. Toponimia, etengabe gurasoengandik seme-alabengana igarotzen den informazioa, galbidean dagoen ondarea dela aipatu du, "azken urteotan asko aldatu da bizimodua eta hein handi batean, eten egin da aipatu transmisio hori. Leku izenak detailez ezagutzen dituen jendea gero eta gutxiago da. Toponimo bat ikasi eta izugarri zabaltzen den arren, beste asko ahaztu egin dira", azaldu du Imanolek. Era berean, antzinako leku izenak ezagutzen dituzten herritarrak gero eta gutxiago direla argitu du. "Amasa-Villabonako mapa toponimikoa egiteko 50-60 lagunekin harremanetan jarri baginen, 12-15 herritarrek soilik ezagutzen zituzten toponimo gehienak. Euskal Herriko txoko guztietan gertatzen ari da fenomeno hori eta ondorioz, urgentziazko lan bat da bilketa egitea".
IKERMAp enpresak antzeko lan asko egin duela jakinarazi du Imanol Goikoetxeak, baina Amasa-Villabonan bezalako harrera leku gutxitan izan dutela adierazi du, bai udaletxearen nola lekukoen aldetik. Aurkezpenean bertan izan den Fernando Letamendia herritarra aipatu du Goikoetxeak, "lekuko askok hartu du parte lan honetan. Besteren artean, Amasako Arratzain baserriko Fernando Letamendia oso lekuko ona izan da. Egin dugun lana estimatu egin du eta bere gaztetako oroitzapenak gogora ekarri ditu: "mila aldiz egon naiz leku horietan guztietan, nola ahaztuko nituen izenak, bada!", esanaz".
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
