Goizean goiz hasi zen mugimendua Zizurkil Goian. Produktuak txukun jarri eta postuak atontzen hasi ziren artisau eta baserritarrak. 10:00etan eman zitzaion hasiera azokari eta laster hasi zen jendea inguratzen. Asko eta asko izan ziren Udalak antolatzen duen autobusez inguratzeko aukera baliatu zutenak.
Artisauen artean, jendearen jakinmina piztu zuen Igor Obesoren beira puztuko postuak. Beirazko lore, ontzi eta animaliak salgai izateaz gain, nola egiten dituen ikusteko aukera ere eskaini zuen Igorrek. Bere postua jendez inguratuta egon zen egun osoan zehar.
Herriko ikastetxeetako haurrek jarritako postuek ere harrera ona izan zuten, baita El Salvadorreko Segundo Montes komunitateari laguntzeko jarritako postuak ere.
Arratsaldean, azoka gunetik Plaza Berrira mugitu zen jendearen arreta. Frogatokiko armailez gain, errepidean eta aldameneko belazean ere, ehunka lagun bildu zen gizon froga ikusteko. Froga ikusgarria izan zen eta gerturatu zirenek asko gozatu zuten. Orioko taldea izan zen garaile Aiztondokoaren aurretik. Zizurkilgo taldeak ere lan bikaina egin zuen. Kontuan hartu behar da herriko gazteek denbora gutxi daramatela entrenamentuak egiteneta hala ere, laugarren postuan sailkatzea lortu zuten. Zorionak!