Eskualdeko turismoa garatzeko egitasmoa

Erabiltzailearen aurpegia Aiurri 2011ko ira. 6a, 17:01

Eusko Jaurlaritzako Merkataritza eta Turismo sailburuordetzak eta Basquetour turismo agentziak 2010-2013 Euskadiko Turismoaren Lehiakortasun eta Berrikuntza Plana bultzatzen ari dira. Sektore honetan diharduten eragile publiko eta pribatu guztien parte hartzea ezinbestekotzat jotzen dute. Horregatik, eskualde mailako lankidetza-taldeak jarri nahi dituzte martxan. Sustapen lan hori Behemendik egingo du eskualdean eta, besteak beste, Andoain eta Urnietako Udalek hartuko dute parte ekimenean.

Administrazioak beharrezkotzat jo du  turismoguneen garapena  sustatzen joatea, horretarako, eskualdeetako turismo-lankidetzarako erakundeak sortzea bultzatu nahi du. Honenbestez, eskualdeko (Andoain, Astigarraga, Hernani, Lasarte-Oria, Urnieta, Usurbil) lankidetza burutuko duena Behemendi elkartea izatea adostu da, bi helbururekin:
  1. Turismo-dinamizaziorako planen bitartez eskualdeko turismo-garapena sustatzea.
  2. Eskualdean turismo-sektorearekin zuzenean edo zeharka lotuta dauden eragile publiko eta  pribatuekin elkarrekin lan egitea.
Behemendik  partaidetzarako bitartekoak eskainiko ditu, modu ezberdinetan:
  • Mahai instituzionala: Eskualdeko udaletxeek parte hartuko dute. Gipuzkoako zein EAEko beste Turismo mahaiekin elkarlanean arituko da.
  • Turismo mahaia: Eskualdeko eragile turistiko publiko-pribatuek osatuko dute. Hauen iritziak nahiz proposamenak jaso (urteko plangintza, eskualdeko plan estrategikoa…) eta onartutako ekintza proposamena mahai instituzionalera pasako ditu.
  • Mahai azpi-sektorialak: Subsektore turistiko pribatu desberdinetako eragileek osatuko dute.

Hurrengo asteetan talde eragileak mahai instituzionala eta turismo mahaia osatu nahi ditu. Behemenditik eskualdeko eragile turistiko desberdinei dei egingo diete, eskualdeko turismo-garapena sustatzeko.

Argibide gehiago:
Gai honen inguruan informazio gehiago:
Behemendi
Ainhoa Amundarain
656 705 243
behemendi@telefonica.net
Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!