Datorren ostegunean, hilak 8, Getxo Folk jaialdiaren baitan, emanaldi berezia eskainiko du Oinkari dantza taldeak. Korrontzi eta Oinkariren elkarlanari hirugarren laguna gehitu zaio azken egunetan, Igor Yebra dantzaria hain zuzen.
Korrontzi & Igor Yebra & Oinkari taldeek "Urratsa" ikuskizuna aurkeztuko dute Getxon eta sorpresaren bat ere gordea dutela aurreratu digute. Emanaldi berezi hau ostegunean izango da, iluntzeko 21:00etan Areeta karpa gunean. Sarrerak www.bbk.es web gunean eskura daitezke, 8 euroren truke:
1974an Bilbon jaio zen Igor Yebra. Victor Ullateren dantza-eskolan aritu zen eta Madrilgo Dantzako Kontserbatorioan graduatu zen ohorezko matrikularekin. 1987tik 1996ra bitartean Madrilgo Erkidegoko Baleteko lehen dantzaria izan zen, eta bertan errepertorio neoklasikoekin trebatu zen: Van Manen, Van Dantzing, Linkens, Balanchine eta Van Hoeckeren koreografiak dantzatu zituen. 1996an bakarkako ibilbideari ekin zion. Atter Balleton, Kremlingo Baletean, Scottish Ballet-en edota Australian Ballet-en dantzatu du, besteak beste. Freelance dantzari moduan Erromako Operako Baletean eta Bordeleko Operako baletean dantzari gonbidatu bezala aritu da. 2007an Bordeleko Operako Baleteko dantzari izar izendatu zuten.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!