Udan zehar batetik bestera dabil Oinkari dantza taldea emanaldiak eskaintzen, batzuetan Korrontzi folk taldearekin batera, bestetan eurak soilik. Berriki, Donostiako Aste Nagusian hartu dute parte, Konstituzio plazako txistularien alardean. Bestalde, entseguetan murgilduta jarraitzen dute, euren hurrengo emanaldi berezia prestatzen. Izan ere, irailaren 8an Getxo Folk jaialdiaren baitan izango baitute hitzordua, Korrontzi folk taldea eta Igor Yebra dantzariarekin batera:
Getxo Folk jaialdi ezagunean, Korrontzi eta Igor Yebra dantzariarekin batera 'Urratsa' ikuskizuna eskainiko du Oinkarik. "Esperientzi eta ohore handia Oinkariko dantzarientzat Igor Yebra dantzariarekin taula gaina konpartitzea", adierazi dute dantza taldeko arduradunek. Musika jartzeaz Korrontzi Folk taldea arduratuko da, dantza alorra Igor Yebra eta Oinkarik beteko dutelarik.
Gogoratu hitzrdua: Irailak 8 osteguna (21:00) Getxoko Folk jaialdia. Sarrerak salgai www.bbk.es web gunean.
Ordutegiak zehaztuta
Era berean, Oinkariko kideek aurtengo entseguen ordutegiak zehaztu dituztela jakinarazi dute: "nahi baino beranduago baino azkenik definitu ditugu datorren ikasturterako dantza ordutegiak. Guztira 286 dantzarik eman dute izena aurten eta ez da lan erraza izan ordutegiak koordinatzea. Ordutegiak www.oinkari.net web orrian daude ikusgai, "albisteak" atalean", jakinarazi dute.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
