Zimiterioko X. Pilota txapelketa

Erabiltzailearen aurpegia Aiurri 2011ko mai. 25a, 13:46

Zizurkilgo Ziotza Kirol Elkarteak hamargarren urtez Zimiterioko binakako esku pilota txapelketa antolatu du. Zizurkilgo elizari atxikita dagoen frontoi berezi horri bizia emateko sortu zen txapelketa herrikoi hau, eta ia hamarkada bat geroago, erabat errotu dela esan azaldu dute antolatzaileek. Iaz 15 bikotek hartu zuten parte.

Iritsi da aurtengorako izena emateko garaia ere. Hauexek eman beharreko pausoak:

Ekainaren 10era arte egongo da zabalik izena emateko aukera. Bete beharreko baldintza bakarra 16 urte baino gehiago izan eta esku pilotan aritzeko gogoa izatea da. Izen-emateak, bikote bakoitzeko 10 euroko balioa du, baina sariak ere ez dira nolanahikoak izango. Irabazleak, txapela, kopa, 120 euro eta afaria bereganatuko ditu. Azpitxapeldunak, kopa, 80 euro eta afaria. Hirugarren eta laugarren geratzen diren bikoteek, afari bana irabaziko dute. Lehenengo bikote zizurkildarrak berriz, 60 euro eskuratuko ditu. Izena emateko telefono hauetara dei daiteke: 616-96-11-53 edo 649.703.472.

Frontoi berezia

Beste zenbait herritan bezala, zimiterioa da jatorriz Zizurkilek pilotan ibiltzeko zuen txokoa. Oso frontoi berezia da; alturaz baxuagoa, bost kuadro besterik ez ditu, eta atzeko pareta erdiraino soilik iristen da. Alboetan bi poste daude gainera, pilotarien jarduna baldintzatu dezaketenak.

Nahi duen edonork aukera paregabea izango du datozen asteetan frontoi honen xarmaz gozatzeko. Kanporaketa partidak larunbat arratsaldetan izan ohi dira eta  finala berriz, ohi bezala, Zizurkilgo Amabirjin jaietan jokatuko da, aurten, abuztuaren 13an. Gauez jokatzen da finala eta jendetza hurbiltzen da ikuskizunaz gozatzera. Badakizue, ez zalantzan egon. Animatu!
Gizartea Zizurkil
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!