Maiatzaren 20an,
arratsaldeko zortzietan (20:00) hasita, LABURBIRA film laburren VIII. zirkuitoko bigarren emanaldia izango da Beterri-Aiztondon, oraingoa Zizurkilen. Emanaldia,
Atxulondo Kulturguneko Ekitaldi Aretoan izango da, arratsaldeko zortzietatik aurrera. Laburbira izeneko VIII. zirkuito hau Euskara Elkarteen Federazioak, TOPAGUNEAk antolatu du, eta Manuel Larramendi Kultur Bazkunaren eskutik iritsi da gure eskualdera, Zizurkilgo Udaleko Kultura Lansailaren babesarekin. Aurtengoa zortzigarren zirkuitoa da, eta bertan azken urtean euskaraz sorturiko 9 film labur ikusi ahal izango dira ordu bete iraungo duen emanaldian. Euskarazko ikusentzunekoen alorrean sortzaile gazte berriak sormen handiz datozela egiaztatu ahal izango dute Zizurkil eta Aiztondoko ikusleek, baina badira tartean ere dagoeneko eskarmentu dezente duten egileak.
Zortzigarren zirkuito honetan hauexek izango dira andoaindarrek Basteron ikusi ahal izango dituzten lanak: Maritxu, Kepa Errastirena; Artalde, Asier Altunarena; Ondar ahoak, Angel Aldarondorena; S@rtaldea, Jon Artolarena; Esku-titi, Saioa Aizpurua Txintxetillarena; eta Blank postcards, Aitor Artola, Irune Gurtubai eta Ibai Vigil-Escalerarena. Gainera, Kameratoia lehiaketako hiru sarituak: Biak bat, Zapatilla films taldearena (lehenengo saria), Barrura begira, Trastaka taldearena (bigarren saria) eta, azkenik, Nire bista faboritoa, Kontraplano taldearena.
Aipaturiko film labur guztiak ordu bete inguruko saio bakar horretan ikusi ahal izango dira. Emanaldiaren amaieran, berriz, Esku-titi filmaren zuzendari izan den Saioa Aizpurua, Txintxetillarekin hitz egiteko aukera izango dute Zizurkilera bertaratzen direnek.
Sarrera doan izango da.
