(Azpikola: Belkoaingo magalean kokatuta dagoen harrobi zaharra eta Azpikola baserriaren kokalekua, Telegrafos-etako Dorrea, "gaztelua" bezala ezagutuagoa, eta N1aren artean)
2011ko otsailaren 24an egindako batzarrean, PP eta PSEren aldeko eta EB, talde mistoa eta PNVren aurkako bozkekin, Andoaingo Plan Orokorra onartu zen. Eta 2010eko martxoaren 14an onarturiko Plan Orokorrarekin alderatuta, aldaketa nabarmenak izan ditu. Azpikolako harrobiari dagokionez, harrobi berri bat irekitzeko aukera zabaldu da eta bertan 140.000m2ko poligono industrial bat kokatzeko aukera dago.
Ez dugu Udalaren bat-bateko jarrera aldaketa hori ulertzen, dagoeneko Andoaingo ingurunearen egoera muturrekoa izanik, jarrera horrek egoera larriagotu besterik ez baitu egingo, ditugun zein etorkizunean eraikiko dituzten azpiegiturengatik: Buruntzako bi harrobiak, Buruntzako autobia berria, eraikitzeko dagoen Sorabillako gerrikoa, poligono industrial berria eta AHTaren trazatuak. Erabaki honen bultzatzaileen aburuz, AHTak Azpikolako harriaren beharra justifikatzen du, nahiz eta orain arteko AHTren eraikuntza proiektu batean ere horrelakorik ez aipatu.
Nekazal lurraren etengabeko galera baten aurrean aurkitzen gara, horrek Andoaingo ingurunearen degradazioa dakarrelarik.
Lege subsidiarioen arabera, Azpikola, ingurune ez eraikigarri moduan sailkatuta geratu zen, Babes eta berreskuratze kalifikazioarekin; eta lurpeko akuiferoen eta basogintzarako garrantzi handiko ingurunea izendatu zuten.
Andoaingo Udalak eskatuta, EKOS - Estudios Ambientales S.L.U. enpresak ingurunearen azterketa egin zuen, eta bertan, babestuta dauden hainbat espezie topatu zituzten, hala nola, bertan bizi diren Belatz handi bikote bat. Horiez gain, babes zorrotza duten Eskulapioren sugea, Harkaitz zozo urdina, Lepitzulia eta Zata arruntak ere aurkitu zituzten.
Azpikola berreskuratzearen beharra dakusagu. Hala nola, herritarren interesak arriskuan jartzen dituzten garapenezko proiektu horiek geldiarazi behar ditugu, gutxi batzuen interes ekonomikoak soilik bilatzen baitituzte eta bizi kalitatearen degradazioarekin zuzenki lotuak dauden ingurumenaren txikizioa eta gure inguruarekin lotzen gaituzten ohituren galera suposatzen baitute.
Azpikola berreskuratu!