Estanis Amutxastegi Andoaingo alkateak poza agertu du Arartekoaren erantzunarekin, “faxistek nahiz Frankoren aldeko indarrek Andoainen fusilatu zituzten herritarren aldeko memoria berreskuratzeko Andoaingo Udalak egindako ahalegina aldarrikatu nahi dut”.
2010eko abenduan Oroituz herri elkarteak prentsa ohar bidez Arartekoarekin harremanetan jarri zela adierazi zuen, Andoaingo Udaleko agintariek azken urteetan elkartearen eta frankismoko biktimen eskubideen aurka erakusten duten “bazterkeria eta gutxiespena salatzeko”. Era berean, Arartekoari egoera horren aurrean babesa eskatu zioten. Oroituzek Udalaren jarrera eza salatzen zuen zera adieraziz: “inoiz ez dugu Udalaren erantzunik jaso, nahiz eta bilera egiteko idatzizko eskaera ugari egin”. Jarrera hori “gizalegerik gabeko beto obsesiboa” dela zioten.
Gaia aztertu eta gero, Arartekoak dio ez duela jarrera okerrik ikusi Andoaingo Udal agintarien jokabidean.
Martxoaren hasieran Arartekoak Andoaingo Oroituz memoria historikoa ardatz duen taldeak aurkeztutako kexaren erantzuna helarazi zion Andoaingo Udalari. Arartekoaren ustean, Andoaingo Udalak Oroituz taldearekiko ez du jarduera okerrik izan. Ondokoa adierazten da, labur eta zehatz, Arartekoaren idatzian: “Kexak, aurkeztutako zenbait eskaerei dagokionez, Andoaingo Udalaren erantzunik eta jarduerarik eza du hizpide. Helarazitako informazioa ikusi ondoren, jakinarazi nahi dizut gure esku-hartzea amaitutzat jo dugula. Izan ere, Udalaren jardueran ez dugu okerrik sumatzen”.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!