Ari du, Oinkariren emanaldi berria

Oinkari dantza taldea, emanaldi berriaren prestaketa lanetan buru-belarri murgilduta dabil azken hilabete hauetan. Korrontzirekin batera azaroan aurkeztutako DVDaren aurkezpen emanaldiak eskaintzen jarraitzen duten bitartean, apirilerako euren bakar-lana iragarri dute; "ari du" ikuskizun berria, hain zuzen.

Ikuskizun berri horretan, euskal kulturan hain presente dauden dantza eta euskal literaturako poesia uztartzea izan du helburu Oinkarik. Juan Kruz Igerabideren ahotsean errezitatuko diren poesiek, euriak duen erritmoa markatuko dute. Oinkari dantza taldeak erritmo horretara egokituko ditu bere dantzak, bai tradiziotik zuzenean ekarritakoak, baita garaikidetasunera moldatutakoak ere. Guztira 75 dantzari izango dira taula gainean, bederatzi musikariren laguntzarekin. Apirilean izango da estreinua, Tolosako Leidor antzokian: