Zakur kakak bertan uzten dituzten zakurren jabeek lotsa pixka bat sentitzea nahi genuke, ea lortzen dugun astintzea horien kontzientzia zibikoa”. Aste honetan guraso talde batek ekimenarekin zer lortu nahi duten argi daukate.
Lopez de la Calle parkeko kasua bereziki deigarria da. Plastiko zorroen bi makina ipinita dauden aren, gorotzak han hemen ageri dira. Ingurune horretan lan egiten duen Josu Gomez kale garbitzaileari kosta egiten zaio ulertzea parke horretan gertatzen den misterioa, zakurrentzat eta euren jabeentzat espreski jarritako makinen inguruan: “250 zorro dituzten paketeak makina horretan sartzen ditugu. Bada, maiz, gaur jarri eta bihar ez da bat bera ere geratzen. Kontua da ondoko zakarrontzian ia ez dela zorrorik uzten, eta parkea aldiz kakaz josita egoten dela!”
Zakurrek, kalean, gogoa datorkien tokian egiten dute kaka. Hala ere, herrigunean badira zenbait toki “errespetatzen” direnak. Kale Nagusia, Kale Berria eta Bastero inguruan mugitzen den Patxi Imaz kale garbitzailearen esanetan “oinezkoen espaloietan-eta apenas jaso behar izaten dugun zakur kakarik; leku horiek, behintzat, salbu daude.
Lorazainak ere kexati
Herritarrez gain lorezainak dira gorotzen “biktima” zuzenenak. Eguneroko borroka bilakatu da. Migel Checak adierazi duenez, “ez da sinestekoa zein egoeratan topatzen ditugun belazeak… Belarra nahiko hazia dagoen tokietan kakarik ez dugu ikusten, baina mozketa egiterakoan sasia garbitzeko makina erabiltzen dugunean, kakaren zipriztinak gorputzera edo aurpegira etorri ohi zaizkigu bete-betean”. Aurpegian jartzen dute babesa mozorro antzekoa da, baina alferrik: “Sareetako zirrikituetatik sartzen zaigu zikina”.
Langileak kezkatuta daude euren osasunari dagokionez: “kexu agertu gara enpresako nagusien aurrean. Albaitariek egindako ikerketek, ordea, zera diote: zakur gorotza oso toxikoa dela eta makina bat gaxotasun dituela berarekin. Lan baldintzataz arduratzen den Osalan organismoak zer dioen jakin nahi dugu”.
Checak gaiaren inguruan sumatzen duen utzikeria kritikatu nahi du: “onartutzat daukagu parkeak zakurren komunak izan behar dutela. Baina ez luke horrela izan behar; parkeak haurrek eta edonoren aisaldirako tokiak behar lukete izan; jolasteko, etzanda egoteko…”.
Udal ordenantza
Andoaingo Udalak aspaldian ezarri zuen animaliak edukitzeko eta babesteko Udal ordenantza arautzailea. Isunak ere aipatzen dira, arauak hautsiz gero ezarri beharrekoak. Arina denean arau-haustea (gorotzen kasua, adibidez) 30 eurotik 300 euro bitarteko kopurua aurreikusten da. Udal zerbitzuetatik adierazi dutenez, iaz lehen aldiz zakur baten jabeari isuna jarri zitzaion. 60 eurokoa izan zen orduan, jabeak uko egin ziolako kaka jasotzeko udaltzainen aginduari.
Andoaingo Udalean orain arte gorotzen inguruko salaketarik ez dutela jaso adierazi dute.
“Ze goxua!”, “Eraman nazazu zurekin”…, antzeko esaldiak dituzten banderatxoak ikus daitezke egunotan zakurren gorotzetan. Deigarri egiten da egun hauetan Doktor Huitziko kaleko eta Lopez de la Calle parkeko belazeei erreparatzea. Ekimena zenbait guraso eta euren seme-alaben eskutik heldu da. Adierazi dutenez, “nazkatuta gaude gure seme-alabek ia egunero oinetakoak kakaztuta dituztela ikusteaz. Arreta deitu nahi izan dugu horrela, neurriak jarri daitezen”. Horien haserreak gainezka egin du, beraz, eta zerbait deigarria egitea erabaki dute, irudimena erabiliz horretarako.
Banderatxoak soilik bi parkeetan jarri dituzte, “egunero haurrekin mugitzen garen lekuetara mugatu gara, nahiz eta jakin arazoa Andoain osora zabaltzen dela”. Astelehenean hasi ziren jartzen etxean egindako banderatxoak, eta berehala agortu zitzaizkien. Belazeetan itxura batean zirudiena baino gorotz gehiago dagoelako.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!