Hamarkada batzuk atzera eginez, ongizatearen gizartea eta gizarte mailako instituzio orokorrak eratu gabe zeudenean, ehundaka izan ziren Joxe Mari Olazabalek etxean hartutakoak. Kontratuarekin, lansariekin, kotizazioekin edo jubilazio-pentsioekin eta abarrekin sortzen ziren hamaika arazo konpontzeko Olazabali laguntza eske joaten ziren.
Gizarte Segurantza ez zen 1966. urtera arte legez sortu, eta ordura arte oso konplexua zen aseguru eta gizarte estaldurekin zerikusia zuen kudeaketa lana. Ordura arte Instituto Nacional de Previsión erakundeak bere baitan hainbat aseguru eta babes estaldura jasotzen zuen, bakoitzak bere araubide, ezaugarri eta baldintzekin.
Eta hauxe izan zen bereziki Jose Mari Olazabalek bere gain hartu zuen lana, ehundaka herritarri bere lan eta gizarte egoerak, bere gaixotasun, ezintasun eta zahartzaro-sariak eskuratzen laguntzea, izapide eta kudeaketa guztiak egitea hasieratik amaieraraino.
Erraz uler liteke, beraz, zergatik den hain ezaguna Andoainen Jose Mari Olazabalen itzal babesle hori, zergatik hain zabala bere ekimenaren oihartzuna, eta zergatik herritar askok ezagutzen duten “Pobreen abokatua” ezizenarekin. Olazabalek eliza katolikoaren baitan aurkitu zuen ia haurtzarotik bere hezibiderako eta ekimenerako leku aproposa eta bertatik bideratu du bere jardunaren zatirik handiena. Beste gazte asko bezala Juventudes Obreras Cristianas mugimenduan parte hartzen hasi zen. Hezibide horretan goiburu nagusia izan zuten: “hezibidea ekintzagatik eta ekintzarako”, alegia, helburua ekimen ezberdinetan esku hartuz nork bere burua hezi eta lanean jarraitzea zen. Olazabalek maiz aitortu duenez, hezur-mamitaraino sartu zieten berari eta beste batzuei bizitza osoan bere jokabidearen iparrorratza izan dena: “Ezer ez garela mundu honetan lagun hurkoa laguntzeko prest ez bagaude, berdintasunetik, laguntasunetik”. Hori izan du, oso gaztetxo zenetik, Jose Mari Olazabalek bere arau nagusi, eta horrekin leial bizitzen ahalegindu da.
Orain gutxi arte Andoaingo Cáritasen buru-belarri aritu da, behar gorrian zeudenen alde lanean. Lan asko izan dira egindakoak, Olazabalekin batera Cáritasen lanean jardun dutenen aldetik.
Jose Mari Olazabal andoaindarrak urte luzez gizarte mailako laguntza eman zion premian zen edonori. Orain gutxi arte ere behar gorrian zeudenen alde lan eta lan aritu da, Cáritas-en eskutik. Herrigintza mailan Olazabal XX. mendeko bigarren erdialdeko erreferentzia nagusietakoa da. Larunbat eguerdian Udalaren omenaldia jasoko du, Andoaingo belaunaldi askorena bide batez.
Andoaindar peto-petoak, gainera, badaki Jose Mari Olazabalek ertz ugari dituela. Herrigintzan eta kirol jardunean ezinbesteko erreferentzia ere badelako. Hori guztia eta gehiago nabarmenduko dute larunbat honetan Andoaingo udaletxean egingo dioten omenaldian. Andoaingo Domina eskuratuko du Udalaren eskutik. Inplizituki itsatsita doa domina horretan atzoko nahiz gaurko herritar askoren esker ona.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!