Ontzerrik Andoainen jokatzeko aukera izango du

Erabiltzailearen aurpegia Aiurri 2010ko urr. 21a, 11:09

Aurreko ostegunean Allurralde Kirol Patronatuko kideek ez ohiko batzarraldia deitu zuten, Ontzerrik Andoaingo futbol zelaia erabiltzeko aukera berriro aztertzeko. Abuztutik indarrean zegoen Patronatuko erabakia behin betiko eman aurretik, Agudo eta Barreiro Hamaikabat eta Ezker Batuko zinegotziek gaia berraztertzeko idatzia aurkeztu zuten. Eskaera hori kontuan hartuta, urriaren 14an ez ohiko batzarraldia deitu zuten eta bertan Ontzerriri Ubitarten jokatzeko baimena ematea onartu zen. Entrenamenduak, ordea, ezingo ditu bertan egin.


Allurralde Kirol Patronatuak 5 puntuko prentsa oharra kaleratu zuen eta 3. eta 4. puntuetan zera erabaki zuten, hitzez hitz:

  • 3.    Astean zehar 17:00etatik 22:30etara entrenamenduak egiteko Ontzerriri Ubitarte zelaia erabiltzeko baimenik ez ematea.
  • 4.    Ontzerriri partida ofizialak Ubitarte zelaian jokatzeko baimena ematea, Euskaldunak ordutegia zehazteko lehentasuna izango duela kontuan hartuz.
Gainerakoan, Allurralde patronatuak eta Euskalduna taldeak duten hitzarmenari eustea berretsi zuten. Eta, azkenik, Ubitarte zelaiaren erabilerari buruzko araudia egitea eskatu diote Allurraldeko zerbitzu teknikoari.

 

Ontzerriko arduradunek erabakia “aurrerapauso”tzat definitu dute. Hurrengo egunetan Futbol Federazioari Usurbilgo zelaia uzteko eta Ubitarte erabiltzeko eskaera egingo diotela aurreratu dute. Okerrik ezean, urriaren 31n Ontzerrik ligako partida Ubitarte zelaian jokatuko du.
Talde bakarrenetakoa izango da futbol zelaia partidak jokatzeko erabili ahal izango duena, eta entrenatzeko aldiz ez.
Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!