Gaur arratsaldeko 19:00etan izango dira Josune Arretxe Zugarramurdi zinegotzi gaztea agurtzeko elizkizunak Amasako San Martin elizan.
Berriki igarotako uztailaren 31n egin zuen azken agerpen publikoa Remi Ayestaran Udal kidearen urteurreneko ekitaldian. Joan zen urriaren 10ean, Remi Ayestarani egin zitzaion omenaldi herrikoian ere hitza hartu zuen Udal taldearen izenean:
"Remi Ayestaranek gaztaro guztia eskaini zion herriari. Zinegotzi kargura iritsi zenean oso argi zeukan herriko talde guztiei ahalik eta laguntza gehien eskaini behar zitzaiela eta herritarren parte hartzea bultzatu behar zela herriak bizirik iraun zezan. Horregatik sekulako ilusioa egiten zion herriko plaza jendez beteta ikusteak. Bere heriotzaz geroztik, herriko plaza hau askotan bete dugu, baina nabermena da barruan dugun hutsunea. Zaila da ulertzea, sinestea eta onartzea Remi ez dugula berriz ondoan izango, ez ditugula bere itxaropen hitzak entzungo. Baina hemen gaude, Remi, zure lanean jarraitzeko prest. Herriak bizirik iraungo du zuk nahi zenuen bezala. Remirekin bi urte eta erdi hauetan Udalean lanean aritu garenok garbi dugu Villabonako alkate-ordearen izena maiuskulaz idatzita gordeko dugula. Herri honek Remi bezalako pertsona leialak, borondate onekoak eta langileak behar ditu eta horrexegatik zen alkate-orde", adierazi eta egindako lan eredugarriagatik, ohorezko makila eskaini zion Udal taldeak familiari. "Mizpiraren adarretatik gora doan izerdiak zuhaitzaren ebakiak zeharkatzen ditu erliebezko apaindurak sortuz. Eta Remik ere, bere izerdiz, makina bat ebaki leundu zuen. Eskuz eta arreta osoz egindako makila hau, berak egindako lanaren ispilu izatea nahiko genuke. Beraz, gure bihotz barrutik Remiren familiari emango diogu aginte makila, beraiek toki kuttunen batean jaso dezaten. Mila esker Remi", esanez amaitu zuen Josunek urriaren 10eko hizketaldia.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!