Aurten ere Gazte Festen barruan ospatuko da Benjamin kirol jaialdia, Udal kiroldegian eta futbol zelaian. Guztira, LH 3-4.mailatako bederatzi-hamar urteko berrehun haurrek parte hartuko dute, hamasei taldetan banatuta. Horietatik zortzi, Urnietako Egape ikastolako eta Presentación de María ikastetxeko ikasleak dira. Gainerako zortzi taldeak Tolosako, Donostiako eta Pasaia herrietako ikasleak.
Goiz eta arratsaldez eskubaloian eta futbolean arituko dira kirolariak. Aurten, gainera, Donostiako suhiltzaileen erakustaldia izango da. Eguerdian bazkaritarako bilduko dira guztiak Egape ikastolan. Bazkalostean, eta arratsaldeko saioa hasi aurretik, kirol jaian parte hartu dutenek puzgarriez gozatzeko aukera izango dute. Eta, ondoren, arratsaldean zehar gainerako haur guztiek puzgarriekin gozatu ahal izango dute.
Egun polita igarotzeaz gain, partaide bakoitzak saria, oparia, merienda eta zozketan parte hartzeko txartela jasoko ditu. Ezin esan Urnietan haur kirolariekin eskuzabal jokatzen ez denik!
Antolatzaileek guraso zein laguntzaileei eskerrak eman nahi dizkiete, haiek gabe benjaminen kirol jaia antolatzea ez litzatekeelako posible izango. Horrez gain, garrantzia handikoa da herriko eragile eta enpresa askok egiten duten ekarpena.
Pertsonai ezagunak
sari banaketa-ekitaldian
Aurten, sari banaketa-ekitaldian ETB 2ko “El conquistador del fin del mundo” saioko lehiakideek parte hartuko dute. Antolatzaileen arabera, partaide guztiak ez badira ere, telebista saio horretako asko eta asko etorriko dira. Hori eta suhiltzaileen erakustaldia dira aurten gehien nabarmentzen diren berritasunak. Egurialdiak lagunduz gero, festa borobila izan liteke.
Egitarau OSOa
Maiatzak 29, larunbata
- 09:00 Taldeen iritsiera.
- 09:30 Aurkezpena futbol zelaian.
- 10:00 Futbol eta eskubaloi partidak.
- 11:00 Donostiako suhiltzaileen erakustaldia futbol zelaian. Kamioia eta guzti ekarriko dute.
- 12:00 Apar festa tenis zelaian, Donostiako suhiltzaileen eskutik.
- 13:00 Egape ikastolan bazkaria.
- 13:30-15:30 Puzgarriak parte hartzaileentzat.
- 15:30 Futbol eta eskubaloi partidak.
- 15:30-17:30 Puzgarriak nahi duen guztiarentzat.
- 17:30 Domina eta sari banaketa. Bizikleta, kasko eta kirol arroparen zozketa. Sari banaketa “Conquistador del fin del mundo” telebista saioko kideen eskutik izango da. Ondoren, merienda.