Gaur izendatuko da Irati Jimenezen eleberria Beterriko Liburu 2009

Erabiltzailearen aurpegia Aiurri 2010eko apirilaren 23a

Gaur, arratsaldeko 19:30etatik aurrera, 111 Akademiako kideek hala erabakita, Irati Jimenezek idatzi eta Elkar argitaletxeak plazaratutako Nora ez dakizun hori eleberria izendatuko dute 2009ko Beterriko Liburu. Amasako Kultur Etxean izango da sari-emate ekitaldia. Bertan izango da idazle saritua eta, besteak beste, Maddi lagunekin talde lapurtarraren emanaldi laburraz gozatzeko aukera izango da. Gerturatu nahi duen ororentzat ateak zabalik izango dira.

Aukeraketa prozesua ezagutu nahi izanez gero, jarrai berria irakurtzen:

Hiru bozketa txandetan garatu da aukeraketa prozesua, urtarrilean hasi eta apirilaren 22an amaitu dena. Lehenengo txandan, 2009an gogokoen izan zuten liburuaren alde bozkatzeko eskatu zitzaien 150 akademiakideei, eta lehen txanda hartan Beterriko Liburu izendatzeko behar zen botoen %30a lortu zuen obrarik egon ez zenez, akademiak ohiko prozedura jarraitu eta beste bi bozketa txanda egin zituen. Hirugarren eta azken txandan Irati Jimenezen Nora ez dakizun hori eta Aingeru Epaltzaren Izan bainintzen Nafarroako errege izan ziren bi finalistak, eta Jimenezen eleberriak jaso du boto gehien; idazle mundakarraren lanak hemeretzi botoko aldea atera dio Aingeru Epaltzaren nobelari. Aurreko bi txandetan ere  Nora ez dakizun hori izan zen boto gehien jaso zuena.

Magia eta fantasia

Mundu fantastiko batera darama irakurlea Irati Jimenezek Nora ez dakizun hori eleberrian. Maitasun ezinezkoak eta kasualitate gertagaitzak, likantropoak eta banpiroak, arima erosten duten aingeruak, ama hil ostean jaiotako haurrak, magoak, bidaiak, ipuinak... Hasiera batean arrotza dirudien mundu horretarako bidaia modu samur eta goxoan egingo du irakurleak, une oro magia eta lilura alboan dituela.

Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!