Beterriko Liburua Aipamena, hamalaugarrenez

Euskal Herriko txoko ezberdinetako 146 irakurle, iazko libururik gogokoena aukeratzeko saiakeran ari da azken hilabeteotan. Irakurle horiek guztiak 111 Akademiako kideak dira. Pasa den urte osoan zehar 2009an euskaraz argitaratu diren liburuak irakurtzen aritu eta gero, behin 2009a amaituta, liburu horietako baten aldeko euren boza emateko garaia iritsi zaie. Azken bi edizioetan bezala, aurten ere bozketa sistema txanda bat baino gehiagotan antolatu da. Lehenengo txandan, irakurri dituzten liburu guztien artetik baten aldeko boza emateko eskatu zaie. Boza horiek zenbatu, eta saritua izateko behar adina proposamen jaso duen libururik ez zegoela ikusita, proposamen gehien jaso dituzten lehen sei liburuak berriz ere akademiakideen irizmenpean jarri dira. Orain, beraz, akademiakideek sei liburu horien artetik baten aldeko boza eman beharko dute. Honako hauek dira bigarren bozketa txandara pasa diren obrak:

•     Martin eta Xabier Etxeberriaren Arrain abisalak.
•     Uxue Alberdiren Aulki-jokoa.
•     Fermin Etxegoienen Autokarabana.
•     Aingeru Epaltzaren Izan bainintzen Nafarroako errege.
•     Irati Jimenezen Nora ez dakizun hori.
•     Karmele Jaioren Musika airean.

Bigarren bozketa txanda
Akademiakideek martxoaren 30a arte izango dute liburu horietako baten alde euren botoa bidaltzeko aukera. Bigarren txanda horretan obra batek jasotako botoen %40 bereganatuko balu, 111 Akademiako batzorde eragileak huraxe izendatuko luke 2009ko Beterriko Liburu; aldiz, kopuru horretara iritsi den obrarik ez balego, hirugarren txanda batean boto gehien jaso duten lehen bi obrak akademiakideen irizmenpean jarriko lirateke, eta bi horietatik babes gehien jasotzen duenak eskuratuko luke saria.

Idazle saritua ekitaldian
Maiatzaren 6an, aurten Amasa-Villabonan egokituko den sari-emate ekitaldiaren egunean, urtero legez, bertan izango da idazle saritua. Ekitaldiaren amaieran, ohi denez, hizketaldia eskainiko du gerturatzen den orori zuzenduta.
Besteak beste, musikariak arduratuko dira ekitaldiari doinu goxoa jartzeaz. Eskualdeko irakurle guztiak gonbidatuta zaudete ekitaldira. Zatozte!