Eguzkiren alegazioak Zubietako errauste-plantari

Zubietan eraiki nahi den hondakinen balorizazio energetikorako plantaren aurrean –errauste-planta, denok ondo uler dezagun–, Eguzki talde ekologistak hainbat alegazio aurkeztu ditu eta baita inguru gaineko eraginaren azterketa bat ere.

Laburbilduz, zortzi dira proiektu honen aurka aurkeztu ditugun argudioak edo alegazioak
 

1. Natura sarea 2000ri sortuko dizkion eraginak, eta zehazki Leitzaran errekari, ES21200113 kodean zehaztuta dagoen espazioarekin duen gertutasunagatik eta lokalizazio horretan nagusi diren haizeengatik (bereziki ipar-mendebaldekoak). EAEn babestutako guneen legedian katalogatuta dago zonalde hau, Leitzaran Babestutako Biotopo gisa ageri da, habitat mailako balio altuarengatik eta berezitasun ekologikoengatik. Baina errauste-plantaren inguru gaineko eraginari buruzko azterketak ez du aipatu ere egiten Atxulondo-Abalozeko gunea, Eusko Jaurlaritzak Heze Guneen zerrendan natura mailako interes-gune moduan zehazturik duen gunea. Eta aipatu behar da gune hau errauste-planta eraiki nahi den lokalizazioaren ondoan dagoela.
2. Usurbil, Oiartzun, Hernani… bezalako herrietan, gizarte eta ingurugiro mailan, birziklatze zein materia selektiboen bilketan eman diren eta emango diren aurrerapenekin amaitu dezakeelako proiektu honek.
3. Hondakinen errauste indiskriminatuak Gipuzkoan bilketa selektiboa sustatzeko eman den partehartzea mantsotu eta geldiaraziko duelako. Beraz, “PIGRUP” planaren helburuen berrikusketa eskatzen dugu.
4. Hondakinen errauste indiskriminatuak karbonoaren zikloa ixtea oztopatzen du, etxeko materia organikoen birziklatze egokiarekin lor daitekeena. Karbono hori atmosferara botako da aldaketa klimatikoan eragin negatiboa sortuz.
5. Atmosferara konposatu toxikoen etengabeko emisioa eragingo duelako, lurzorua kaltetuz eta uren poluzioa eraginez. Bizkaiko Zabalgarbi ikustea besterik ez dago.
6. Erraustutako hondakinen %36a pisuan, hondakin berri batean bilakatuko da –errautsak eta erreusa-, segurtasun altuko zabortegi batean tratatzea eskatzen duena (eraiki beharko litzatekeena).
7. Donostia, Usurbil, Lasarte-Oria, Hernani, Andoain, Urnieta, Aduna, Zizurkil, Orio eta Zarautz herrien zonaldean ingurugiroan eta giza-osasunean sortzen dituen kalteengatik.
8. Bizi-gune batetik 2.000 metroko distantzia ez duelako errespetatzen (“RAMINP” delakoan aurreikusita dagoen distantzia).

Horregatik guztiagatik, “Donostiako herrian hondakinen balorizazio energetikorako plantaren egitasmoaren” tramitazio administratiboa behin behineko izaeran geldiaraztea eskatu du Eguzkik, eta berau erretiratzea aztertu dezatela.