XII. Erreportari Gaztea sari banaketa ekitaldian

Erabiltzailearen aurpegia Aiurri 2009ko abe. 11a, 14:42

Datorren ostegunean, abenduaren 17an, XII. Erreportari Gaztea sariaren irabazleak ezagutzera emango dira, eta sari-banaketa egingo da. Andoaingo Gazte Lokalean izango da ekitaldia, arratsaldeko 6etan hasita.   Ekitaldia irekia izango da eta edonor etor daiteke.  Hiru sari eta Aipamen Berezia emango dira. Ekitaldian Kemen Lertxundi kantariak parte hartuko du. Gazteen artean arrakasta handia duen kantaria da Lertxundi. Hilabete honetan plazaratu du disko berria: “Begi berriak atzo gaueko irudientzat” izenekoa. Durangoko Liburu eta Disko Azokan arrakasta bikaina izan du disko honek, ale asko saldu dira, eta bertan jasotako kantu batzuk kantatuko ditu Lertxundik. Moda-modako kantaria, beraz, Andoainen.

KEMEN LERTXUNDI
Begi berriak atzo gaueko irudientzat
Gazte Lokala- ANDOAIN

Abenduak 17 – 18:00

Kontzertu akustiko laburra DOAN  

Erreportari Gaztea Sariaren aurtengo edizioan hogei idazlan aurkeztu dira, eta 44 gaztek parte hartu dute lan horien idazketan. Aduna, Andoain, Asteasu, Astigarraga, Amasa-Villabona, Hernani, Larraul, Lasarte-Oria, Urnieta, Usurbil edo Zizurkilen bizi diren edo ikasten duten 18 urte bitarteko neska-mutilek izan dute parte hartzeko aukera. Andoaingo Udalak euskarazko komunikazioa bultzatzeko helburuarekin hainbat ekimen sustatzen ditu: ezagunena Rikardo Arregi Kazetaritza Saria da, eta Erreportari Gaztea Saria ere ekimen horietako bat da, gazteei zuzendutakoa.
 
Hiru sari eta Aipamen Berezia ematea erabaki du aurten epaimahaiak. Jone Larrañaga, Jon Ander Ubeda eta Ainhoa Oiartzabal kazetariek osatu dute epaimahaia. Andoaingo Udaleko Euskara Zinegotzi Petri Romerok emango ditu sariak: lehendabizikoari 360 euro eta Xabier Laka eskultoreak egindako oroigarria, bigarrenari 180 euro eta hirugarrenari 90 euro.
 
Saritutako lanak argitaratu egingo dira, eta argitalpena sari-banaketako ekitaldian banatuko da.

 
 
 

 

Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!