"Beraiekin gaude. Gure indar guztia eta baldintzarik gabeko maitasuna beraientzat". Astearte goizaldean Hego Euskal Herrian atxilotu zituzten 34 gazteen atxiloketa masibo eta arbitrarioak salatzeko prentsaurrekoa burutu dute lagun eta senideek, gaur arratsaldean Usurbilgo pilotalekuan.
Gazteok pairatzen ari diren egoerari buruz informaziorik ez dutela azpimarratu dute, bertaratu diren irratiko mikrofono edota telebista kameren aurrean. "Ez dakigu non eta nola aurkitzen diren", adierazi du komunikatua euskaraz irakurri duen senideetako batek. Era berean, inkomunikazio egoerak torturen sinonimo direla badakitela ere adierazi dute. Euren errugabetasuna defendatu dute. "Gure seme-alabak ez dira lapurrak, ez gaizkileak. Ikasle eta langileak baizik", gaineratu dute. Herriaren alde borrokatu direlako atxilotu dituztela berretsi dute. Atxiloketok salatzeko larunbat honetarako, azaroak 28, manifestazio nazionala deitu dute Bilbon. 17:00etan irtengo da Aita Donostiatik. Bertaratu diren senide eta lagunen txalo artean, eta atxilotuak askatzea galdeginez amaitu dute ekitaldia.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!