Iruña-Veleiako grafitoak, benetazkoak?

Atzo iluntzean, txoko ezberdinetatik etorritako jende asko bildu zen Iruña-Veleiako aurkikuntzen inguruan Aritza kultur elkarteak antolatu zuen hitzaldira. "Iruña-Veleiako grafitoak, benetazkoak?" izenburupean, aurkikuntzen nondik norakoak eta grafitoak faltsutzat jo izanaren inguruan argibideak azaldu zituzten Eliseo Gil, Aztarnategiaren zuzendari ohiak; Idoia Filloy, Aztarnategiaren zuzendaritzako kide ohiak; Koenraad Van Den Driessche, Geokimikan espezializatutako geologo doktoreak eta Juan Martin Elexpuru, Euskal Filologian doktoreak. Azalpen guztien gainetik dei bat nagusitu zen: azterketa sakona egitearena: "Orain artean hizkuntzalariek soilik azaldu dute euren iritzia. Haatik, beste zientziek ere badute zeresana eta azterketa fisiko-kimikoak beharrezkoak direla uste dugu, piezen faltsutasuna edo benetakotasuna modu horretan frogatzen baita. Inondik inora ezin da begiz hartu erabakia eta ez da nahikoa iritzia ematea. Aztertu egin behar dira".