Danborrada urriaren 3an
Urdanbor elkarteak antolatuta, aurtengo helduen danborrada urriaren 3an izango da. 75en bat herritarrek parte hartzen duten ekitaldia 20:00ak aldera hasiko da, elizan bizpahiru abestiz osatutako kontzertu txiki batekin. 21:30ean afaria egingo dute Oianume jatetxean, eta gaueko hamabietatik aurrera kalejira egingo dute Urnietako kaleetatik barrena beste bi ordu eta erdiz.
Baina aurrez, irailaren 11n arratsaldeko 20:00etan urteko Batzar Orokorra izango dute Lekaio kultur etxean. Dagoeneko entsegu egunak ere zehaztuta dituzte: Irailak 14, 16, 18, 21, 23 eta 25ean gaueko 20:30etik 21:30era Lekaion. Norbaitek lehenengo aldiz parte hartu nahi baldin badu, bertara azaldu edo Urdanborreko arduradunen bati lehenbailehen jakinarazi.
Alkate txikien aukeraketa
Irailaren 15ean 19:00etan Lekaion egingo da aurtengo Sanmieletako Haurren egunean agintean izango den bikotearen aukeraketa. 2.000.urtean jaiotakoak soilik izango dira aukeraketa horretan parte hartu dezaketenak.
Jaien aurkezpena 18an
Irailaren 18an arratsaldeko 19:30ean Lekaio kultur etxean jaietako egitarauaren aurkezpen ofiziala egingo da. Bertan, elkarte bakoitzak antolatutakoaren berri emango du. Ekitaldi berean, Alkate Txikien eta jaietako kartelaren aurkezpena egingo da. Jaietako kartelen lehiaketara aurkeztutako kartel guztiekin egingo den erakusketa ere ekitaldi berean inauguratuko da.
Baita ere, jaietako argazki lehiaketan parte hartuko dutenei argazki bobina banatuko zaie.
Egape haur danborradan
Sanmieletako haur danborrada tradizio handiko ekitaldia da. 30 urtez jarraian Presentacion de Maria ikastetxearen eskutik burutu bada, aurtengoan berrikuntza nabarmen bat izango du, bertan Egape ikastolako haurrak ere parte hartzeko aukera izango dutelako.
Egapeko haurrak danborradan lehenengo aldiz parte hartzeko izango duten aukera zoragarriaren aurrean bertako gurasoak gogotsu ari dira lanean, baina kanpoko laguntzarik ere izan dute, Andoaingo, Aita Manuel Larramendi Ikastolakoa hain zuzen ere, eta bereziki eskertu nahi dute Jose Mari Marzolen eskuzabaltasuna. Baita ere, eskerrak eman nahi dizkiete Urnietako Udalari eta Presentacion de Maria ikastetxeari bidea errazteagatik. Eta oraindik laguntzeko prest den gurasorik baldin bada gogo onez jasoko dituzte laguntza eta ideia berriak.