Lekaio kultur etxea
Zabaldu da datorren ikasturteari begira, Lekaio kultur etxeak antolatu dituen ikastaroetan izena emateko epea. Matrikulazioa egiteko azken eguna, hilaren 18a izango da eta interesdunek bi bide dituzte aukeran. 943 008 033 telefono zenbakira deituta edo kultur etxera bertara gerturatuta. Irailaren 11 arte, 8:30-13:30 artean zabalduko da Lekaio. Helduei zuzendutako ikastaroetan, prezioa %20 merkeago izango dute 21 urtetik beheragoko edo 60 urtetik goragokoentzat. Aldiz %20 garestiago, Urnietan erroldatu gabe dauden herritarrek. Ikastaroen ordutegiak zehazteko edota beste edozein zalantza argitzeko bilera informatiboak antolatuko dira irailaren 23 eta 24an, Lekaion bertan. Hona hemen, aurtengorako prestatu duten eskaintza:
- Helduen eskulanak: astean bi orduz. Prezioa: 180 euro.
- Helduentzako pintura ikasketak: astean bi ordu eta erdiz. Prezioa: 225 euro.
- Helduentzako zur taila ikastaroa: astean bi ordu eta erdiz. Prezioa: 225 euro.
- Eskulan, pintura ikastaroa haurrentzat: astean ordu eta erdiz. Prezioa: 159 euro.
Dantza soltea
Egape Dantza Taldeak irailerako bigarren hamabostaldirako dantza solteko ikastaroa antolatu du. Izen ematea jada zabalik dago, honako telefono zenbakian, 12:30-14:30 artean: 696 393 406. Ikastaroa honako egunetan eskainiko da, aipatu bezala, hil honetan zehar: irailaren 15, 17, 18, 21, 23 eta 24an. Ordubeteko saioak izango dira, 18:30-19:30 artean eskainiko direnak. Egape Dantza Taldeko arduraduna izango da irakasle lanetan jardungo dena; Edu Muruamendiaraz.
Begirale ikastaroa
Buruntzaldeko udalek Urtxintxarekin batera elkarlanean, Eusko Jaurlaritzak homologatutako aisialdiko begirale titulua eskuratzeko aukera eskaini nahi diete eskualdeko gazteei. Irailaren 18ra arte matrikulazio epea zabalik egongo da, Udaleko euskara zerbitzuan. Baldintzak: euskalduna izan eta 18 urte beteak izatea.