Arau Subsidiarioen dokumentua
Herri Antolakuntzarako Plan Nagusiari lotutako dokumentua berridatzi beharko da, hala erabaki zen gehiengo osoz uztailean burutu zen osoko ohiko bilkuran. UDA-k, ezker abertzaleak eta EAJ-PNV-k babestu zuten erabakia. Antza, erreklamazioak aurkezteko ireki zen epean, 37 alegazio aurkeztu eta aldaketa sakonak proposatzen ziren. Horri lotuta, datozen asteotarako, Udalak parte hartze batzordearen bidez, bilera ireki sorta antolatu du Lekaion, herritarrekin etorkizuneko Urnietaz hitz egiteko. Gaika antolatu dira bilkura hauek. Hala, etxebizitza, industria edota oinezko bideei buruz jardungo dute. Bileren egutegia, agenda atalean ikusgai.
KIROLDEGIKO AURREPROIEKTUAK
Kirol instalazioak berritzeko aurreko hilabeteetan, Urnietako EAJ-PNV-ko eta PSE-EE-ko zinegotziek euren proposamenak aurkeztu zituzten. UDA-k ere berea aurkezteko asmoa du. Ostiral honetan, irailak 4, kirol instalazioen eraberritzeari buruz jardungo dute Lekaion antolatu den bilkura irekian. Arratsaldeko 19:30etik aurrera, dauden proposamen desberdinak hizpide izango dituzte kultur etxean. Herritarren parte hartzea sustatzeko, Udalak parte hartze batzordearen bidez antolatu duen bilera sortan lehena izango da gaurkoa.
Uztaila amaierako osoko bilkuran parte hartu zuten udal ordezkarien gehiengoak 2009ko udal aurrekontuen alde bozkatu zuten. Hau da, gobernu taldeko, EAJ-PNV-ko eta ezker abertzaleko zinegotziek. PSE-EE-ko udal ordezkariak aurka bozkatu zuten bakarrak izan ziren. Onarpenak behin betiko izaera du. Inbertsioen atalean, udal aurrekontuok Egape ikastolako jolas lekua estaltzeko baliatu nahi dira, baita Xoxokako eskola zaharra eraberritzeko ere. Aipatzeko modukoa da, sail guztietan murriztu egin direla diru-partidak, Ongizatean izan ezik, egungo krisialdia aintzakotzat hartuta, %50 igo baitira larrialdiko laguntzak.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!