Herritarrak krisiaz, jaiaz eta Koadrilen egunaz

1.- Krisia dela eta, zer iruditzen zaizu Udalak jaietako aurrekontua murriztu izana?
2.- Santiotan gogoz parte hartuko duzun ekintza?
3.- Nola antolatzen duzue Koadrilen eguna lagunartean?

Miriam Tena
1.- Krisi egoeran zentzuzkoa iruditzen zait aurrekontua murriztea. Gainera, zaila izaten da jaietan horrenbeste egun ekintzaz betetzea eta modu honetan, osatuagoa geratuko da egitaraua.
2.- 24ko herri afariaren ondoren danborradan ateratzea asko gustatzen zait. Eta nola ez, oso gogoko dut Koadrilen eguna; primerako giroa sortzen da eta urtero hartzen dugu parte.
3.- Jakintzan koadrilatik 15 bat lagun joaten gara Etxe-Ondora. Batzuk mahaiak eta aulkiak hartzeaz arduratzen dira, beste batzuk janaria ekartzeaz. Azken urteotan kanpotik eginda ekartzen dugu jatekoa: entsalada eta oilasko erreak. Postrerako gozoa eta edateko, sagardoa eta ura.

Ane Vicario
1.- Oso erabaki ona dela uste dut. Krisi garaian, jaiak baino egoera garrantzitsuagoak badaude eta hobeto iruditzen zait, esaterako, behar dutenei laguntza ematea.
2.- Lehen gaueko herri afaria eta Euskal jaia asko gustatzen zaizkit, baina dudarik gabe, Koadrilen eguna dut gogokoena. Eguraldi onarekin eta Etxe-Ondon, noski.
3.- Exer Hadi koadrilako kide naiz eta 12 lagun joaten gara bazkarira. Garai batean guk prestatzen genuen jatekoa, baina azken urteetan kanpotik eginda ekartzen dugu: entsaladak eta paella gehienetan. Edateko ardoa, sagardoa, koparen bat eta xanpaina ere bai. Txarangarekin poteoa egiten dugu gero.

Xabier Otegi
1.- Egoera horrelaxe etorri da eta oso egokia iruditzen zait erabakia. Udalak oso detaile polita izan duela uste dut eta herritarrek begi onez ikusiko dutela iruditzen zait.
2.- Oporrak izaten ditut eta seme gaztearekin batera, ia ekintza denetan hartzen dugu parte. Gehien gustatzen zaiguna, dudarik gabe, Etxe-Ondoko bazkaria da.
3.- Goizean lekua hartu, bazkaria prestatu eta arratsaldean txarangarekin kalejiran ibiltzen gara. Txip koadrilako lagunak elkartzen gara; haur eta heldu, 20 bat lagun guztira. Jatekoa eta edatekoa, denetik izaten da egun horretan. Herritarren artean elkartasun eta harreman polita sortzen da. Egun zoragarria da.

Urtzi Basterrika
1.- Egoera honen aurrean mezu txiki bat ematea denez, ondo iruditzen zait. Tabernak eta txoznak zabalik mantentzen badira, nahi duena berdin aterako da festara.
2.- Lehen eguneko herri afari eta danborradan, Euskal jaian eta Koadrilen egunean hartzen dugu parte gustuen.
3.- Garagardo azokan, Santiotako ekintzatan parte hartuko dugun 78ko belaunaldia koadrilako kideon zerrenda egiten dugu. Koadrilen egunean 30-35 lagun biltzen gara: pikatzekoa erosi eta paella egiten dugu lagunartean. Sagardoa eta ardoa ekartzen dugu bazkarira. Normalean kaxak hartzen ditugu eta, modu horretan, 24rako eta 30erako iristen zaigu. Kopak bidean hartzen ditugu gero.