JULEN LOITEGI, FINALERA
BIGARREN ALDIZ
Eizagirre zarauztarraren aurka igaro den ostiralean jokatu zuen norgehiagokan nagusitu ostean, Udaberri Txapelketako lau t´erdiko finalera ailegatu da Julen Loitegi, kadete mailan lehen urtean dabilen pilotaria. Herriko udal pilotalekuan bildutako zaletuek Loitegiren denboraldiko partida onenaz gozatu ahal izan zuten. Bere jokaldi batek baino gehiagok bertaratu zirenak zutik jarri eta haien txalo zaparrada eragin zuten.
Bitxikeria moduan, aipatzekoa da, iragan astekoarekin guztira zortzi partida jokatu dituela. Zazpi irabazi ditu eta bakarra galdu, lehenengoa, Aritz Lizaso urnietarraren aurkako neurketa. Ia final nagusian ere, azken saioan erakutsitako maila mantentzeko gai den. Loitegirentzat urte honetan jokatzen duen bigarren final saioa izango da. Aurrekoan, Ahetze Etxeberria eta Unai Arozena kideekin batera, Udaberri Txapelketako hirugarren mailan garaile amaitu baitzuten.
SENIOR NESKEN
DENBORALDI AMAIERA
Gomazko paletan lehian aritu diren senior mailako hiru herritarrek denboraldia amaitu dute. Arantxa Goenagak, Sare Esnalek eta Karmele Urbistondok osatutako taldea trinketako Emakumea Pilotari txapelketako finalerdietara ailegatu dira aurtengoan. Ezin ahaztu, Emakumea Pilotari-ezker horman eta Emakumea Pilotari Irekian izandako parte hartzea. Ezta udal pilotalekuan eta Salesiar ikastetxean burututako entrenamendu saioak edo ezker paretako zein trinketako teknifikazio jardunaldiak ere.
Udan atseden hartu eta irailean berriz entrenatzen hasiko dira Goenaga eta Esnal. Urbistondok, ebakuntza izan ostean, errekuperatu zain egon behar.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!