Ahozkotasuna eta bertsolaritza

Erabiltzailearen aurpegia Aiurri 2009ko mai. 4a, 15:55

Maiatzarekin batera eta urteroko ohiturari jarraituz, aurten ere martxan da “Ahozkotasuna eta Bertsolaritza” proiektuaren barruko jaialdien aroa. Gipuzkoako Bertsozale Elkarteak herrialde osoko hainbat udaletxe eta ikastetxerekin elkarlanean aurrera daramaten proiektuaren baitan, aurtengoan 7.000 ikasletik gora izango dira Gipuzkoa osoan zehar maiatza eta ekainean egingo diren herri mailako 57 jaialdietan parte hartuko dutenak. Euskal Herri osoan diren 12.500 ikasleen lagin bat izango da Gipuzkoakoa eta eskualdeko bertsolari gazteek ere parte hartuko dute:

-Maiatzak 5, asteartea: Zizurkilgo Atxulondo Kultur Etxean, 18:00etan.

-Maiatzak 12, asteartea: Asteasun, 18:00etan.

-Maiatzak 13, asteazkena: Amasa-Villabonako Gurea antzokian, 18:00etan.

-Maiatzak 26, asteartea: Andoaingo Bastero Kulturgunean, 18:00etan.

-Maiatzak 28, osteguna: Adunan, 18:00etan.

Bertsoaren eta honek dakartzan baliabideen bitartez irudimena, diskurtsoak garatzeko gaitasuna, hizkuntzarekiko harreman ludikoa, elkarrizketarako zein temarako baliabideak, arrazoiketa kritikoa eta abar luze bat lantzen saiatzen dira proiektuaren partaide diren irakasle eta ikasleak. Maiatzeko bertso-jaialdi hauek honen guztiaren erakusgarri izan nahi lukete, beti ere jaialdi mota honek bere-berezkoa duen umore onari leku eginez.
 
Beti da motibagarri “Ahozkotasuna eta Bertsolaritza” proiektuan parte hartzen duten ikasleentzat ikasitakoa jendaurrera eramatea; jaialdi hauek ematen duten aukera baliatzea, beraz, modu bikaina da egiten duten ahaleginari esker ona adierazteko.
 
Hilabete osoan zehar luzatuko den jaialdi-aro honetan ikusle bezala parte hartzeko modua izango du, tokian tokiko emanaldietara gerturatzen denak.
 

Gizartea
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!