Zubillaga 14 urterekin Laborden hasi bazen ere, Orbelan lantegian egin zituen bere bizitzako urterik gehienak.
Langileen lan baldintzak eta askatasuna, bi aldarrikapenak uztartzen zituen herri mugimenduko kide ezagunetako bat izan zen 60-70eko hamarkadatan. CCOO sindikatuko eta MCE-EMK alderdi politikoko kide izan zen orduan. Garai istilutsu horri buruz Zubillagak eta beste zenbait garaikideek emandako testigantzak Leyçaur 5 aldizkarian geratu dira jasota (Otaegi, Karmele: La transición desde la perspectiva de la izquierda).
Franco hil osteko lehen urtetan, estatu aparatoetatik gertu zebiltzan inkontrolatuek gogor kolpatu zuten Andoaindik Astigarraga bitarteko eskualdea. Hilketak, tiroketak, erreketak... gertakizun ilun ugari gertatu zen oso denbora laburrean, eta Heriotzaren Hirukia deitu izan zitzaion orduan inguru horri. Zubilllaga biktimetako bat izan zen, hain zuzen. Heriotz mehatxuak jasan zituen, eta bai berari eta baita bere anaiari ere auto bana erre zieten, 1979ko martxoan.
ZINEGOTZI ANDOAINGO UDALEAN
Franco hil eta gero eratu zen lehen udal demokratikoan (1979-1983) parte hartu zuen zinegotzi gisa, esan bezala, EMK alderdia ordezkatuz. Bere botoak, gehi PSOEren hiru botoek eta EEren bost botoek azken alderdi honetako hautagai zen Jose Antonio Perez Gabarain jarri zuten alkatetzan orduan. Ramon Ansa Zinkunegi EAJkoa zen beste hautagaia (zortzi boto).
Asteartean hil zen Agustin Zubillaga Arrizabala Xuxton, Andoaingo lehen udal korporazio demokratikoko zinegotzia. Urtarrilaren hamalauan arratsaldean bere familia, adiskide eta militantzi kide ugari bildu zen Errekaldeko beilategian, azken agurra emateko. Ospakizun zibila izan zen eta bertan bere bizitzako pasarterik garrantzitsuenak (familia, militantzia, zaletasunak....) agertzen zituen ikusentzunezkoa ikusi ahal izan zuten bildutakoek. Bere bi alabek prestatu zuten ikusentzunezkoa.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!