Zizurkilgo Udalak aurtengo azokaren balorazio positiboa egin du, nahiz eta krisi ekonomikoaren itzala nabaritu den: "Baserritar eta artisauek krisia nabaritu dela adierazi dute. Beste urteetan baino jende gutxiago ibili dela iruditu zaigu eta erosketak ere ez dira aurreko urtekoak adinakoak izan. Hala ere, jende asko gerturatu zen eta bertako giroa oso ona izan zen".
Berrikuntza bezala, talo postua jarri zen lehendabiziko aldiz eta eguerdi aldera, jendetza handia hurbildu zen bertara. Eguerdian egin zen, baita ere, postu onenaren sari banaketa: "Aurten Andrezketa Baserriak jaso du eta hau izan da Zizurkilen jaso duen lehen saria. Sari honek produktuen kalitatea baloratzen du, eta ez postuaren itxura. Sari hau ematearekin batera, Zizurkilen Barrena Beka aurkeztu zen berriz ere. Aurtengoan Zizurkilgo euskara bildu eta ikertzea du helburu beka honek. Proposamenak aurkezteko epea urriaren 24an amaitzen da."
Haurrentzako joalasa, kantu jirako kideen emanaldiak, trikitilarien doinuek eta txakurren erakustaldi bikainak borobildu zuten eguna.