Nola oroitzen duzu kargu hartze eguna?
Xabier Sasiainbarrena: Hasieran nahiko urduri sentitu nintzen, lehenagotik zeuden zirkunstantziengatik. Baina unea iritsita, irakurri beharrekoa irakurrita lasaitu nintzen eta uste nuena baino askoz hobeto sentitu nintzen. Ez da espero nuen errefusa, ondo hartu naute eta momentuz, pozik nago. Ikusi behar, zer gertatuko den.
(jarraitzen du...)
Baten baino gehiagoren galdera izan liteke, dimisioa aurkeztu eta gero nolatan onartu duzun orain, zinegotzi kargua?
X.S.: UDA beste lau kidek eta nik fundatu genuen. UDA-k herritik hasi eta Udalera zihoan politika egin nahi zuen, politizaziorik gabe. Orain arteko politika beti Udaletik abiatu eta herritarrenganakoa izan baita. Zerrendak osatzerakoan, bi pertsona aurkeztu nituen lehen bi postuetarako. Huts egite handia egin nuela uste dut, eta hori, Mendaroko plataformakoek politikaririk ez sartzea aholkatu zigutenik. Kargu hartze egunean, Javier Madrazo eta Antton Karrera etorri zirenean, kanporatu behar izan genituen.
Bestalde, ez genuen lortzen UDA-ren idearioa martxan jartzea.
Gainera, herritarren parte hartzea garatzea ez ziguten utzi. Horregatik eta arrazoi gehiagorengatik UDA-ko zuzendaritza batzordekook kide gehiagorekin batera dimisioa aurkeztu genuen.
Orain, teknikoki zer egoeratan zaude?
X.S.: Plataformatik dimititu genuen. Egun, independentea naiz. Hala ere, UDA-k herriarentzat ona den proiektu bat aurkezten badu, haren alde bozkatuko dut. Beste alderdiekin bezala. Udalerri mailako politika egin nahi genuen, baina ez da posible izan, Ezker Batua hor dagoela garbi ikusi baita. EB-k bere izenean UDA-ko bi hautagai aurkeztu ditu Kutxako Administrazio Kontseilurako. Gauza asko egin dituzte EB-ren izenean, eta UDA-ren bizkar. Baina onartu ez duguna eta onartuko ez duguna, traizioa egitea da. Horregatik, plataforma utzi genuen, baina ez guk sortutako idearioa. Irailean gure mailan lanean hasteko asmoa genuen. Zinegotzi kargua eskaini zidatenean, onartu nuen. Badakit oso gaizki hartu dutela. Ezin izan dute haiek nahi zuten pertsona bat sartu eta zinegotzi bat galdu dute. Horrek ez du esan nahi haien aurka joango garenik, herriaren alde baizik. Hori da geure lehentasuna.
Hiru zinegotzi udal gobernu taldean. Egonkortasun aldetik nola ikusten duzu etorkizun hurbila?
X.S.: Udal gobernu taldeak norbaitekin paktu edo akordio puntualak egin beharko ditu, ezin baitu gobernatu. Ez dugu inoren oposizio izan, ezta gobernu pakturik egin nahi ere. Ez gara gobernagarritasunerako oztopo izango. Egoera nahiko nahastua dago, udaletxean ez baitago nagusi den indar bat.
Zeintzuk dira epe motzerako dituzuen egitasmoak?
X.S.: Geure helburuak 2006ko urriaren 26ko berak dira, UDA abiatu genuenekoak. Herriak nahi duenaren bozeramaile izatea udaletxean. Auzo batean adibidez zerbait falta dela ikusten dutenek gugana etor daitezela eta ahotsa izan dezatela udalean. Urnieta gobernagarria izan eta herriak hobera egitea nahi dugu.
Baduzue gai konkreturen bat esku artean?
X.S.: Hasi berriak gara. Gauza asko dugu. UDA-ko proiektua hor dago, Tokiko Agenda 21 eta haren zirriborroa herritarrek eskatutako 300dik gora proiekturekin. Asko, aurkeztu eta onar litezke.
Aurrekontuen gaia ere tartean izango duzue?
X.S.: Akordio batera iristea espero dugu eta iaz gertatutakoa ez errepikatzea. Herriaren alde lan egin nahi dugu.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!