Hitzaldiaren helburua, Haur Hezkuntzan edota Lehen Hezkuntzan ikasten duten neska-mutikoen gurasoei nolabaiteko orientazioa ematea da, seme-alabek hizkuntzaren inguruan dituzten jokabideetan eragiteko. Alegia, mota honetako galderetarako erantzunak emango dira:
-Orain arte lagunekin euskaraz egin izan dute, baina azken aldian gaztelaniarako joera sumatu dut. Zer egin dezaket?
-Seme-alabei euskaraz egiten diegu, baina gure artean gaztelaniaz egiten dugu, zer eragin izan dezake horrek beraien jarreretan eta jokabideetan?
-Nik esandako gauza asko zuzendu egiten dizkit. Kasu egin behar al diot?
-Nik euskaraz dakit baina bikoteak ez. Nola egin behar dugu seme-alabekin?
Hitzaldia euskaraz izango da eta guraso euskaldun guztiei zuzenduta dago. Nolanahi ere, garrantzi berezia emango zaio guraso euskaldun berrien ikuspuntuari.
Julio Ibarraren hitzaldia Villabona eta Zizurkilgo Euskara Zerbitzuen eskutik
Villabonako eta Zizurkilgo Euskara Zerbitzuek Mintzalaguna egitasmoaren ikasturte bukaerarako antolatutako ekintzen artean, Ebete elkarteko Iñaki Eizmendi teknikariak eta Julio Ibarra komunikatzaile ezagunak hitzaldia eskainiko dute ostiralean, hilaren 20an, arratsaldeko 19:15etan, Villabonako udaletxeko balio anitzeko gelan. Landuko duten gaia: “Nola eragin seme-alaben hizkuntza jokabideetan”.
AIURRI hedabideak eskualdeko nortasun hitzak jaso eta zabaltzen ditu. Harpidedun eginda, tokiko albisteak euskaraz lantzen dituen komunikabidea babestuko duzu.
Egin AIURRIkide!
Egin AIURRIkide!