Apirilaren lehenean Topagunea euskara elkarteen federazioak Euskarazko Film Laburren V. Zirkuitua aurkeztu zuen Donostian. Zirkuituak hamar lanez osatutako film labur eta bideo lanen bilduma zabalduko du Euskal Herriko 38 herritan. Larramendi Bazkunaren ekimenez, eta Andoaingo nahiz Zizurkilgo Udalen laguntzarekin, eskualdean ikusi ahal izango da Euskal Herrian ekoizten den zinerik berriena.
SORTZAILE BERRIAK
Topaguneko kideek agerraldian adierazi bezala, “aipatu beharra dago aurten apustu berezia egin dela egile eta formatu berrien alde. Ondorioz, zirkuituan ‘beteranoak’ diren Koldo Almandozen eta Iñigo Kintanaren lanekin batera, bidea egiten hasi diren Gentzane Agirre, Mikel Alvarez eta Asier Mendoza, eta bideo-sorkuntzan esperimentatzen dabilen Logela Multimedia taldea ere gonbidatu egin ditugu aurtengoan”.
Film Laburren Zirkuituaren bidez, Topaguneak eta osatzen duten euskara elkarteek aukera ematen dute euskarazko film laburren produkzioa ezagutarazteko, eta, bide batez, herrietako kultur eskaintza aberasteko ere bai. Federazioak bere gain hartzen du filmak bilatzeko, aukeratzeko eta batzeko lana, eta gero aukera ematen die nahi duten elkarte guztiei euren herria zirkuituan sartzeko. Emanaldi kopuruak argi erakusten duenez, ekimenak oso harrera ona izan du: 38 emanaldi eskainiko dira Euskal Herri osoan.
Ikusleak eta egileak elkarrengana hurbiltzea ere bada helburuetako bat, eta hori dela eta, saio askotan solasaldia egingo da egileekin, proiekzioaren ondoren.
Film laburren zirkuitua
EGUNA ORDUA HERRIA TOKIA
Apirilak 17, osteguna 19:30 Andoain Bastero
Apirilak 25, ostirala 20:30 Zizurkil Atxulondo
Maiatzak 4, igandea 19:00 Urnieta Sarobe
Eskainiko diren lanak:
> Unrest 6’20’’ Gentzane Agirre
> All about Eves 3’15’’ Gentzane Agirre
> Azken trena 7’3’’ Mikel Alvarez
> Columba Palumbus 4’ Koldo Almandoz
> Momorro 6’’35’’ Asier Mendoza
> Itzalak 14’ Iñigo Kintana
> Ardauaren negarra 3’15’’ Logela Multimedia