Zer dela eta esku pilota uzteko erabakia?
Oñatz Gonzalez. Bi arrazoi daude: irakasle lanetan hasi naizenetik lehen bezala entrenatzeko aukerarik ez edukitzea eta esku pilotarako motibazioa jaistea.
Oso gustura nabil irakaskuntzan baina denbora kentzen zidan fundamentuz entrenamenduetako disziplina jarraitu ahal izateko, lehen egiten nuen eran. Denbora berean, ohartua nengoen jada oso aukera eskasak neuzkala profesionaletarako saltoa egiteko.
Unerik gozoenean-edo zeundenean, utzi egin behar.
O.G. Egia esango dizut. Jende ezagun asko etorri zait egunotan, pasa udan oso maila ona eman nuela-eta harrituta hartu dudan erabakiarekin. Baina nik argi neukan tajuz entrenatu gabe ez nintzela lehiatzera plazaratuko. Sentitzen nuen oraintxe zela uzteko unea. Pena ematen dizu asko-asko sakrifikatu naizelako. Baina poz galantarekin ere uzten dut kirol hori, hamabi urtez gehien asetu nauen gauza egin dudalako, lagun asko egin dudalako, eta gainera, fama handiko txapelketak irabazteko zoria eduki dudalako.
Zergatik enpresek ez dute kontuan hartzen, zu bezalako palmaresa?
O.G. Gaur egun, oso-oso maila handia dago afizionatuetan, eta lehia izugarria da. Telebistak esku-pilotaren gorakada ekarri du, eta herrietan gero eta eskola eta gazte gehiago ari da jokatzen… Oso garesti jarri da enpresen begiko izatea.
Beraz, txiki-txikitako ametsari uko egin behar izan diozu?
O.G. 9 urte nituela lagun batek Arrate frontoira eraman ninduen, pilota probatzekotan. Txoratuta geratu nintzen eta harrezkero, gainerako kirolak baztertu eta eskuzko pilotari heldu nion buru belarri. Kontsejupean orduak eta orduak sartuta nago; Kontsejupera eskolatik atera orduko edo errekreo garaian; lagunekin izan bakarrik izan. Piskanaka, jolasa zena lehiaketen dinamika bihurtu zen, piskana hobetuz eta emaitza hobeak lortzen… Bide horretan, ez dut ukatuko profesional izateko ametsak ere izan ez ditudanik. Andoaingo lehen esku-pilotari profesionala izatearekin ere amestu izan nuen!
Jaso duzun eskarmentuarekin, zer gomendatuko zenieke pilotari gaztetxoei?
O.G.Ez dakit pertsona egokiena naizenik, baina esan diezaieket oso polita dela amets horiek edukitzea, eta ze arraio! eduki egin behar dira. Nahiz eta gero, frustrazioa hartu... Disfruta dezatela batez ere.
Erremontean ari zara orain...
O.G. Bai, orain gutxiko kontua da. Lagun batek ¨hik daukaken gorputzarekin, erremontea probatu behar dek¨, komentario horixe egin zidan. Galarretara joan, zesta hartu, probatu eta… gustatu! Oso ezberdina da jokoa, baina oraingoz ilusioa piztu eta gozatzen ari naiz.
Urte horietan lagun izan dizutenak gogoan hartu nahi, une hunkigarri honetan?
O.G. Gurasoei eman nahi nizkieke eskerrak, bereziki. Edozertarako ondoan eduki izan baititut txikitandik. Eta ondoren, aipatu nahi nituzke animoak emateko beti gertu izan ditudan adiskide eta jarraitzaileak, amonarengandik hasita.
ANALISIA:
ANDONI ALVAREZ
Andoaingo pilota eskola
Ohore bat izan duk, herriko taldean hire jokoarekin gozatu ahal izatea! Zorte on erremontean Oñatz!