Sorozabal
Udaberriko goiz fresko hontan
Egun on bezate danak
Hemen ditugu Algodoneran
Langile leial izanak
Zuek zerate plaza honetan
Gure ohorezko damak
Gure umeen amonak eta
Gure herriaren amak
Aitor Mendiluze
Zorretan daude zorretan gaude
Zorretan dago Andoain
Miresmen keinu bat eskaintzeko
Eskerrak emateaz gain
Lehen egindako ahalegin denak
Gogoan harturik orain
Jaiegun honek izan nahi luke
Lan egun askoren ordain
Sorozabal
Isil isilik eta lanean
Eman ezkero bizia
Esan liteke omenaldi bat
Dagoela merezia
Gure herriko kondaira dago
Zuen oihalez jantzia
Hori izan bedi historiari
Emandako herentzia
Aitor Mendiluze
Hari bat eta beste hari bat
Beste muttur bat iruten
Matatza gisa jakin dutenak
Denborarekin irauten
Orain betiko bihurtu dira
Ez muga ta ez iraupen
Erakusteko hari mutturrek
Zenbat gauza lotzen duten